Shillong, Lber 08: Kum shi bynta ban rakhe ïa ka sngi burom ki riewkynthei ne ka ‘International Women’s Day’, ha ka sngi Balang ka seng National Domestic Workers’ Movement (NWDM) da ka jingiatreilang bad ka Meghalaya Aids Control Society (MACS) ka la pynkupburom ïa ki riew kynthei kiba dei ruh ki nongbylla ïng briew.
Nalor ka jingpynkupburom, ka NWDM bad ka MACS ka la ai jinghikai ruh ïa ki riew kynthei halor ka koit ka khiah bad halor ka jingliang shngaiñ haka por trei naka bynta ka bha ka miat jong ki baroh.
Ha kane ka sngi na ka liang ki nongmihkhmat jong ka MACS ki la ai jinghikai ruh ïa ki samla bad longkmie halor ka jingpang HIV AIDS bad kumno ban sumar haba ïadei bad une u khñiang jingpang ban lait na kane ka jingpang.
Ïa kane ka prokram ban rakhe ïa ka sngi burom ki riewkynthei la pynlong hapoh ka Savio Hall, Laitumkhrah ha kaba da ki spah ngut ki samla kynthei bad ki longkmie ki la wan ban shim bynta.
Ki kongsan kiba wan shim bynta ki kynthup Dr. Judita Syiemlieh bad ka kong Bakodor Kharwanlang kaba dei ruh ka Vice President jong ka All Meghalaya Domestic Workers Union.
Nalor ka jingshah hikai halor ka hok ki nongtrei bylla sngi bad halor ka jingpang HIC AIDS, ha kane ka sngi la sakhi ruh ka jingïashim bynta ki riew kynthei ha ka shad, ka rwai tynrai jong ka jylla Meghalaya bad ka shad tynra jong ki jaidbynriew Bodo.
