Ai jingkyrshan ïa ngi ha ka elekshon MDC bad elekshon MP ha u 2024: VPP
Ai jingkhublei ïa ki nongkyrshan ha ka elekshon MLA
Shillong, Lber 08: Ka Voice of the People Party (VPP) ha ka sngi Balang ka kyntu ïa ki paidbah ka jylla ban ai ka jingkyrshan ïa ki kyrtong ka VPP ki ban ïakhun sa ïa ka ilekshon Member of Parliament (MP) jong ka Lok Sabha bad kumjuh ïa ka elekshon MDC ha ki district council jong ka jylla Meghalaya kaban sa long ha u snem 2024.
Ha ka kyrwoh sha ki lad pathai khubor u Nongaitktien ka VPP u Dr. Batskhem Myrboh, u la kyntu ïa ki paidbah ba kin ai jingkyrshan shitrhem ïa ki kyrtong kiba ka party kan sei ha kine ki elekshon ban sa wan bad kumjuh u la pyntip ba haduh mynta ka Party kam pat shim rai halor ki kyrtong ki ban ïakhun ïa ka ilekshon MP 2024 bad ïa ka ilekshon MDC hapoh ka jylla.
U Dr. Batskhem u la ong, “Ka Party kan sa shong ban pyrkhat bad kan sa shim ïa ka rai ha ka por kaba biang.”
Haba ai khublei ïa u paidbah uba la kyrshan ïa ki kyrtong ka VPP ha kane ka elekshon MLA kaba dang shu dep ha kylleng ki constituency ba ka sei kyrtong, u Dr. Batskhem u la ong ruh ba “Ka jingkyrshan jong phi ha kane ka elekshon ka la kren briew ha ka kam saiñhima jong ka jylla ha kaba saw ngut ki kyrtong na ka party ki la ïoh ban long ki dkhot ka Ïingdorbar Thawaiñ jong ka jylla ban wanrah ïa ki mat ki jura jong ka jaidbynriew bad jong ka jylla hi baroh kawei.”
Shuh shuh u la ong, “Ka jingkyrshan jong phi ïa ka Party kaba ieng skhem halor ka nongrim jong ka saiñhima bad ka synshar paidbah kaba khuid bad ba shisha ka ai ïa ka jingkyrmen ba ha ka wei ka sngi ka Meghalaya kan long ka jylla ban ai nuksa ïa ki wei pat ha ka synshar ka khadar kaba bha ïa kaba ngi lah ban sngew sarong.”
Kumban shu pynkynmaw ba ka VPP watla ka dang dei ka Party ba thymmai hynrei ka la jop haduh 4 ngut ki MLA na ki 18 ngut ki kyrtong kiba ka sei ha kane ka elekshon kaba dang shu kut haka 7 tarik Rymphang 2023 kaba la pynshaïong ïa kiba bun bah.