Rakhe ka Mawhati BJP ïa ka World Tourism Day ha Mawïambei ha Ri Bhoi

0

Nongpoh, Risaw 01: Ka Mawhati BJP Mandal ryngkat ki khynnah skul bad ki paidbah nongshong shnong ka Shnong Moïambei ki la pynlong ïa ka jingrakhe ïa ka World Tourism Day ha u lum Mawïambei kaba dei kawei na ka jaka kaba don ïa ka khanatang bad kaba lada lah ban pynbit pynbiang katei ka jaka ka lah ruh ban long kum kawei na ka jaka jngohkai pyrthei ha Ri Bhoi.
Ha kane ka jingrakhe la shim bynta lang da u Dr. Evarist Myrsing kum u kyrtong ka BJP na Mawhati bad la sakhi lang ruh da ka jingdon lang u President ka Mawhati BJP Mandal, u Bah Shanborlang Rympei bad kiwei kiwei ki riew rangbah bad ki khynnah skul na katei ka skul.
Kum ban pyntip paidbah, une u Mawïambei u dei u Maw uba heh bha bad ba la don ka khanatang ba une u Maw u la nguit briew ha kaba ka khana ka dang neh haduh kine ki sngi bad na ka liang ka Mawhati BJP Mandal ki la pynlong ban rakhe ïa kane ka World Tourism Day ka long shi bynta ban pynpaw pyrthei ruh ïa kane ka jaka kaba lada lah ban kyntiew ïa ka kam jngohkai pyrthei kan ai jingmyntoi ïa ki paidbah katei ka thain.
Na ka liang u Dr. Evarist Myrsing u la pynpaw ba kane ka jingrakhe ka BJP ïa kane ka World Tourism Day ka long shi bynta ban don ruh kata ka thong ba ka kam jngohkai pyrthei ka dei kawei na ka lad kaba ai kam ai jam ïa ki khun samla ka juk mynta bad dei namar ka daw la pynlong ïa kane ka jingrakhe hapoh une u Mawïambei kaba dei kawei na ka jaka kaba lah ban khring ïa ki nongjngohkai pyrthei.
Shuh shuh, u la pynpaw ruh ba kum u samla ka dong Ri Bhoi un dang shim khia ruh ban dang pynpaw pyrthei ïa utei u Mawïambei namar ka thong bad ka jingangnud ka long ban pynkylla kum kawei na ka jaka jngohkai pyrthei hapoh katei ka shnong kaba dang dei tang ka shnong nongkyndong, hynrei la jin ba wan ka jaka jngohkai pyrthei kan long ka jingmyntoi ïa ki paidbah nongshong shnong katei ka thaiñ hi baroh kawei, u la bynrap.

Leave A Reply

Your email address will not be published.