Dang duna bha ki longïing kiba pynrung pynrung kyrteng ban ïoh ïa ka MHIS, ong u M&HO ka Nonglang PHC

La rakhe ïa ka sngi kyrpang ki Tymmen ha Langpih

0

Nongstoiñ, Risaw, 1: Kum ka jingïasnohkti lang bad ka pyrthei shi tyllup, ka tnad ka koit ka khiah jong ka West Khasi Hills ha ka sngi thohdieng, ka la pynlong ïa ka jingrakhe ïa ka World Heart Day ha Langpih. Ha katei ka sngi la pynlong ïa katei ka prokram ha phyllaw jong ka Raidmynsaw Upper & Secondary skul, ha kaba la pynïaid da u bah Hindro Samakha.
Shuwa ban sdang ïa ka jingsam dawai sha ki paitbah bad ka jingeksamin ïa kito ki ba don ha ka met ka bym koit bym khiah bad ruh ïa ki longkmie ba armet, la ïoh ïa ka jingpynshai na u Dr. M Pohshna Medical Health Officer jong ka Nonglang PHC. U Dr.Pohshna u la pynshai ha kaba ïadei bad ka rukom sumar ïa u klongsnam ban lait na ki jingpang ba bun jait.
Ha kaba ïadei ba ki jait jingpang kiba ktah ïa u klongsnam ki dei ka jingdih duma ba kynthup ïa u duma kyllaiñ, sikret, biri, ka jingdih kyiad, bam raja, khaini, kwai bad kiwei kiwei ki jait jingbam kiba la shna na u duma. U la ong ba ki lad jingsumar kiba bha tam ban lait na ki jingpang kiba ktah ïa u klongsnam, ki long ki bym lut pisa wat tang shi tyngka ruh namar lada pynmlien ban leh exercise da kaba pynlut por tang shiteng kynta man ka step, da kaba suk yn lait na kitei ki jingmlien kiba lah ban ktah ïa u klongsnam.
U Dr Sutnga u la pynshai ruh ha kaba ïadei bad kawei ka jingpang stem kaba la sdang ban kynrei bha ha kine ki sngi bad kumno katei ka jingpang ka saphriang na uwei sha uwei pat. Haba pynshai halor katei ka jingpang, u Dr. Sutnga u la ong ba ka jingim lyngkar, ki nongdih drok kiba pyndonkam lang da u juh u thyrnia bad kiba dro tatoo ki kloi bhaban ïoh ïa katei ka jingpang stem.
Nalor kata u la pynshai ruh ha kaba ïadei bad ka jingshongkha khlem dei por jong ki samla. Haba bynrap halor ka jing shongkha khlem dei por, u la ong ba ka ktah haduh katta katta ïa kia jingkoit jingkhiah bad ka aiñ ruh ka la pyrkhing bha halor katei ka jingshongkha khlem dei por bad ka aiñ Sorkar kan ym shah jem, lada ka tip ïa kiba pynkheiñ bad ka phah kem beit bad pynngat ïa u shynrang ha ka POCSO Act.
Ha kaba ïadei bad ki lad jingïarap jong ka sorkar ïa ki paitbah khamtam eh ïa ki longkmie kiba armet, la ïoh ïa ka jingpynshai na u Dr M.Pohshna Medical & Health Officer ka Nonglang PHC. U Dr Pohshna haba pynshai ha katei ka sngi, u la pynkynmaw ba ka Meghalaya Health Insurance Scheme (MHIS), ka dei kaba kongsan bha ba ka sorkar ka la pyntreikam na ka bynta ban ai jingïarap sha kawei pa kawei ka longïing ha ka ri baroh kawei. Katei ka skhim ka long san lak tyngka kawei ka longïing ha kaba mynta ka la kyntiew biang sa laiphew hajar tyngka. Wat la katta ruh haduh mynta ka jingwan phah register jong ki paitbah ha ka jylla na ka bynta ban ïoh ïa katei ka jingïarap na ka sorkar ka dang duna bha.
Nalor kata u la pynshai ruh ha kaba ïadei bad ka skehim kaba thymmai kaba la tip kum ka Chief Ministers Special Health Scheme. Haba pynshai halor katei ka skhim, u Dr.Pohshna u la ong ba katei ka skhim ka dei kaba la mang kyrpang tang na ka bynta ki longkmie kiba armet. Ka sorkar ka la buh da ki kali kiba kyrpang ki ban leit shaw ïa ki longkmie ba armet naduh ïing jong ki haba ka la dei ka por ba kin wan kha khunlung ha ki Hospital.
Ha kajuh ka por u la pynshai ba na ka bynta kitei ki kali kiba ka sorkar ka la buh kyrpang, ki longkmie kiba wan kha khunlung ha ki hospital kim don kam ban siew wat shi tyngka ruh. Lada ki donkam ban wan phah sumar lypa haduh ban da dei ka por ban kha la ka long lai sngi ne saw sngi bad ki donkam ban sah ha jan ki hospital. Ka sorkar ka la pynkhreh ruh ïa ki jaka sah ba kyrpang bad ïa u ba wan ap ka sorkar ka siew da ka bainong bad ka la pynbiang ruh ïa ka bam ka dih bad wat lada ka longkmie kaba wan sah ha katei ka ïing ba la shna kyrpang ka don ïa u khun uba dang ar snem ne tam ka lah ban wan rah lang ha katei ka jaka bad ka sorkar ka pynbiang ïa ka bam ka dih.
U Dr Laloo haba ai jingkren ha katei ka sngi u la pynkynmaw ba ha ki snem ba u dang don ha Nonglang PHC, ka thaiñ Langpih kam pat don surok satia hynrei namar ka jingdonkam jong ki paitbah ïa ka jingïarap, ma u ryngkat ki staff jong ka Nonglang PHC, kim banse ban ïaid da ka kjat ha katei ka thaiñ, na ka bynta ban leit ai jingsumar ïa kiba pang ba shitom khamtam ha katei ka thaiñ ka jingpang khie shohrih kaba kynrei bha.

Leave A Reply

Your email address will not be published.