Plie bad pynher lama u Rev. P. Dkhar ïa ka jingrakhe ‘Golden Jubilee’ jong ka BSI, Mawkyrwat Branch

Mawkyrwat, Risaw, 01: U Pastor P. Dkhar uba dei u Secretary jong ka Bible Society of India, Shillong Auxiliary u la ïoh ban plie ïa u mawnongrim bad pynher ruh ïa ka lama kum ka dak jong ka jingplie ïa ka jingrakhe ïa ka jingkynjoh ha u mawmer ba 50 jong ka ïaid lynti ka Bible Society of India, Mawkyrwat Branch (1972 – 2022) ha kaba ïa kane ka jingïalang la pynlong ha ka jaka jong ka jingtei ïa ka ophis treikam jong ka BSI Mawkyrwat Branch.
U Pastor P. Dkhar, Secretary jong ka Bible Society of India, Shillong Auxiliary ha ka jingkren jong u u la pynpaw ka jingnguh nyngkong eh ïa U Trai Kynrad na jrong Uba la ri la sumar bad btin lynti ha ka jingpyntyllun jong ka Bible Society ïa ki kam jong ka jingshakri ïa U Blei lyngba ka jingpynphriang ïa ka Ktien jong U Blei ha kylleng ki jaka. Haba kren ha ka jingïadei bad kane ka sngi kaba khraw jong ka jingrakhe ïa ka jingdap 50 snem jong ka Bible Society of India, Mawkyrwat Branch u la ong ba ka long kaei kaei ka kam jong ka jingjop na ka bynta ka kyrteng u Jisu Khrist.
U Pastor P. Dkhar ula pynkynmaw ruh ba ka jubili ka dei kata ka bynta jong ka jingpynïasuk, ka jingkmen bad da kaba pynkynmaw ruh lyngba ka jingpule na ka kitab u Lebitikos 25: 9 – 10: ki kyntien kiba ong, “Ynda kumta men phah put ïa ka turoi ka jubili ha u bnai ba hynñiew bad ha ka sngi ba shiphew jong uta u bnai; ha ka sngi ba shiphew jong uta u bnai ha ka sngi jong ka jingpynïasuk, to put ïa ka turoi lyngba ïa ka ri baroh kawei. Bad to pynkyntang khuid ïa ka snem kaba sanphew, bad to pynbna ïa ka jingpylliatluid ha ka Ri ïa ki khun ki hajar jong ka baroh; kan long ka jubili ïa phi; bad to ai ba uwei uwei baroh un leit phai pat sha la ka jong ka khyndew, bad uwei uwei baroh un leit phai pat sha la ka jong ka ïing”. U la ong ruh ba kane ka jubili kan long ka jubili jong ka jingsuk, jingkmen bad kyrmen skhem ba baroh ki Balang ba kin ïoh ban ïa shimbynta ha kane ka sngi kaba khraw bad kumjuh ban shakri ïa U Blei.
Ha kajuh ka por u la pynkynmaw ruh ba ka Bible Society ha ka pyrthei ka la kynjoh ïa u mawjam ba 222 ei ei snem, ha ri India ka don ïa u mawmer uba 211 snem, ha ka Shillong Auxiliary ka la ïaid 66 snem bad kaba kham kongsan mynta ka sngi ba ka Bible Society of India jong ka Mawkyrwat Branch pat ka don mynta ha ka jingdap 50 snem bad kine kiei kiei baroh ki long lyngba ka jingkyrkhu ka ksang kti ba donbor jong U Trai Nongpynim.
U Pastor P. Dkhar u la ïathuh ruh ïa ki katto katne ki kam ba ka Bible Society of India ka leh ha kaba ïa dei bad ka jingpyntyllun ïa ka kam lyngba ka jingpynmih ïa ki Bible ne ki Kotbah ha kiba bun ki bynta kata ha ka ‘Brill Bible’, ‘Audio Bible’, kham kyrpang ïa ka Ktien jong u Blei na ka bynta kito ki briew kiba don ka jingduna ha ki dkhot met bad ka jinglah ban pynmih ïa kine ka dei lyngba ka jingïatreilang jong baroh ki Balang. “Ngi kham sngewtynnad kaba ai ban ïa kaba pdiang”, ong u Pastor P. Dkhar bad ai ba kane ka mynsiem kan ïai neh ha ki khun jong U Blei ha lynter ki sngi.
Ha kajuh ka por u la ai khublei jubili ruh na ka bynta ki nongkitkam jong ka Bible Society of India, Mawkyrwat Branch bad kumjuh ruh ïa ki paidbah ‘riew ngeit kiba hapoh jong ka, ba haba ki rakhe ïa kane ka sngi kin phai dien ruh ïa ki sngi kiba la leit namar kum ka Bible Society of India ha ka jingpyntyllun ïa ki kam ka la mat bad ïa kynduh shibun ki jingeh hynrei da ka jingïatreilang jong ki Balang ka kam jong U Kynrad mynta ka la nangïaid shaphrang na kawei ka sngi sha kawei pat.
Ha kane ka jingplie la ïadonlang naduh ki Pastor, ki Tymmen Basan, ki Rangbah Balang bad kumjuh ruh ki nongkitkam na ki Jingïaseng Kynthei jong ki 4 tylli ki Presbytery bad kynthup ruh na ka District Mawten jong ka Balang U Blei Meghalaya & Assam.
Ha shwa ban plie bad pynher ïa ka lama la ïoh ban pynlong ïa ka jingïaseng ha kaba u bah S.L. Paliar, Chairman ka Golden Jubilee Committee u la pynïaid bad ai ruh ki kyntien pdiang sngewbha bad bud sa ka jingpule bad duwai na ka kong Wansara Marbaniang, RWBSC.
La ïoh ruh ka jingkren lyngkot na u Tymmen Basan S.C. Syiemlieh, Secretary ka Golden Jubilee Committee, ka jingrwai kyrpang na ka Jingïaseng Samla Balang Presbyterian Mawkyrwat, ka jingkren ai khublei na u Tymmen Basan J.D. Nongsiej, Secretary ka BSI Mawkyrwat Branch bad jingdwai pynwai na u Pastor (Dr). S.I. Iawphniaw.
Lah ban pynkynmaw ba ïa kane ka jingrakhe jong ka jingdap 50 snem ka Bible Society of India, Mawkyrwat Branch ynsa pynkut ha u snem 2023 ha ka 25 – 26 tarik jong u bnai Lber ha ka Balang Presbyterian Mawkyrwat.