Shillong, ïaïong, 11: Ryngkat lang bad ka pyrthei baroh kawei ka ophis jong u Director Ayush, ka Sorkar Meghalaya ha ka Lah sngi U Blei bad ha ka sngi Baar ka la rakhe ïa ka World Homeopathy Day da kaba pynlong ïa ka jingmareh marathon kaba hapoh san kilomitar ba la ïashim bynta palat san spah ngut ki paidbah ba kynthup naduh ki heprit kiba la kynjoh ïa ka rta kaba 5 snem shaneng haduh kiba la kynjoh ïa ka rta kaba 26 snem shanong. Ïa kane ka marathon kaba la sdang madan Polo la kaweh lama da u Ex-State Nodal Officer u Dr. W.Y Dhar ha kaba la sakhi lang da ka Dr. (Mrs) H.C Lyndem.
Hadien kane, la bteng ïa kane ka jingrakhe ha ka sngi Baar da kaba pynlong ïa ka jingïalang ha Moreau Institute of Integral Training and Research Society kum ka jingkynmaw burom ïa ka sngi kha kaba 268 snem jong u Dr.Christian Friedrich Samuel Hahnemann, uba long u nongshem ïa ka jingsumar Homoeopathy.
Ha kane ka sngi, la sakhi lang da u Deputy Commissioner jong ka East khasi Hills District u Sibhi Chakravarthy Sadhu uba la long kum u Kongsan ha ryngkat ka jingdonlang jong ka Director of Health Services (MI) ka Dr. HC Lyndem, kaba long ruh ha kajuh ka por ka Incharge Director jong ka Ayush kaba la long kum ka symbud Kongsan kiba la sam ïa ki registration certificate Jong ka Board of Homoeopathy sha ki 54 ngut ki doctor kiba la pyndep ïa ka Homoeopathy bad hashwa kane la pynbam smai ruh ïa ki doctor kiba la pyndep ïa ka Homoeopathy da ka Dr. Bisolin Dhar.
