Dibrugarh, Iaiong11: U Myntri kam pohïing ka sorkar pdeng u Amit Shah hynne ka sngi u la pynkut ïa ka jingleit jurip ba arsngi sha ka thaiñ Northeast da kaba pynlong ka jingleit sha Dibrugarh, Assam ban ïa don bynta ha ka jingïalang buh mawnongrim na ka bynta ka jingtei ïa ka ophis treikam bathymmai jong ka seng BJP bad ai jingkren ruh ha ka rally ha kaba u la ong ba ha ka election Lok Sabha 2024, ka BJP kan jop haduh kumba 300 seat bad u Myntri Rangbahduh (PM) Narendra Modi un thaw ïa ka sorkar ha ka sien kaba lai kynthih.
“Nga kwah ban pyntip ia ka Congress ha ha ka election Lok Sabha 2024, na ki 14 tylli ki seat ha Assam, ka BJP kan jop 12 bad hapoh ka ri baroh kawei ka BJP kan jop palat ïa ka 300 seat bad u Modi un thaw biang ïa ka sorkar ha ka sien kaba lai kynthih,” ong u Shah.
U Shah u la kynthoh ruh ïa u Rahul Gandhi sa shisien pat da kaba ong; “U Rahul Gandhi u la leit sha ri nongwei bad leh bym salia eh ha kaba ïadei bad kane ka ri.Ka dang don ka por na ka bynta u Rahul Gandhi lada um pynkylla noh ïa ki jinglong ki jong u, kata kumba ka seng Congress ka la shah sar na ka thaiñ Northeast, hapoh ka ri baroh kawei ruh kan wan jia kumjuh.Ka Congress ka la ong u Modi ula jan sha ka jingtep..shah ba Ngan ong ha ki…ki 120 klur ki briew ki duwai miet bad sngi na ka bynta ka jingim kaba jlan jong u Modi. Katta phi nang kynthoh ïa u Modi, u syntiew lotus un nang phuh bad kham phyrnai shuh shuh.”
Ha ka juh ka por u Amit Shah u la pyrto bad ai khublei ïa baroh ki nongtrei jong ka party hapoh ka thaiñ Northeast.
“Ha ka election ha ki laitylli ki jylla ka thaiñ Northeast ngi la lah ban ïoh ïa ka jingjop..ngi la don bynta ha ka sorkar; ha baroh ki phra tylli ki jylla ka thaiñ Northeast ngi don ïa ka sorkar NDA. Dei namar ka sorkar jong u Modiji la weng noh haduh kumba 70 percent ïa ka aiñ AFSPA na ki bynta jong ka Assam, ka jingsuk ka la wan ha ka thaiñ Bodoland, wat ha Karbi Anglong ka la don ka jingsuk.ïa ki jingïakajia pud hapdeng ka Assam bad kiwei pat ki jylla ka thaiñ Northeast la lah ban weng noh,” ong shuh shuh une u myntri kam pohïing ka sorkar pdeng.
