Pan jingkyrshan bad ai khublei ka VPP ïa ki paidbah halor ka jingdawa pynkylla ïa ka Reservation Policy
Shillong, Ïaïong 11: Ka Voice of the People Party (VPP) ha ka sngi Ba-ar ka pynpaw ïa ka jingsngewnguh ïa ki paidbah ka jylla kiba la ai jingkyrshan kaba pura ïa ka jingdawa ka party ban pynkylla ïa ka Reservation Policy bad kumjuh ban dawa ba dei sahngeh shuwa ïa ka jingpyntreikam ïa ka roster system.
“Kum ka party ngi ai ka jingïaroh sha ki seng bhalang bapher bapher bad ki riew shimet ruh ki ba la ai jingkyrshan basngur bad bapura jong ki ïa ka jingïaleh ka Party ban pynsangeh shwa ban pyntreikam ïa ka roster system kat bym pat pyndep ïa ka jingpynkylla ïa ka jingbhah kam. Ka Party ka kut jingmut ban nang pynkhlaiñ shuh ïa ka jingdawa bad jingïaleh ban wan rah ïa ka jingpynkylla ïa ka rukom bhahkam na ka bynta ka jingbiang lang jong baroh ha ka jylla.” ong ka kyrwoh na u Nongaiktien ka VPP u Dr Batskhem Myrboh sha ki lad pathai khubor.
Shuh shuh na ka liang ka party ka pan ruh ka jingkyrshan kaba pura na ki paidbah ka jylla ha kaba ïadei bad kane ka mat tad haduh ba ka jingdawa kan urlong.
“Ka long kaba donkam eh ban ngin long ki ba ïa tylli mlon baroh hapoh ka jingïalam ka VPP namar dei tang kane ka Party kaba buh ïa kane ka mat ha ka thup kular elekshon (manisfesto) jong ka. Ka jingpyrshang jong ki katto katne ban pynsaphret ïa ka sur u paidbah hadien ka elekshon ha ka ba ïadei bad kane ka kam kan wanrah tang ka jingshah rem bad ka jinglehraiñ,” ong u Dr Batskhem
“Ka mynnor ka sakhi shai wat haba bun ki nongïalam sengbhalang ki ba mih shakhmat ban dawa ïa ka jingpynkylla ïa kane ka rukom bhahkam kaba dkoh ha kiba bun ki liang hynrei ki leh klet pat ha ba ki la long ki nongïalam ha ki party bapher bapher,” u la bynrap.
“Kumta ka Party ka ïawer ïa i wei pa i wei ban ïasnoh kti lang bad ka VPP ha ka jingïaleh jongka khnang ban ngin ïoh ïa ka jingjop. Kumba la pynbna mynshwa, ka Party nalor ba kan ïa kren bad ïa ka sorkar kan pynlong ruh ki jingïalang ha kylleng ka jylla ban pynshai sha ki paidbah ïa ka jingdonkam ban pynsangeh shwa ïa ka roster system bad ban pynkylla ïa ka rukom bhahkam,” pynkut ka kyrwoh na u Dr. Batskhem Myrboh.