Da ka Solar Lighting System bad Street Light iarap ka Star Cement ïa ki shnong bym don ha Khamasmari ka India

0

Khliehriat, ïaiong 11 : Ka shnong Sakhri bad ka shnong Pandare, ki dei ki shnong kyndong kiba don hapoh ka elaka Narpuh, East Jaiñtia Hills District, ki nongshong shnong jong kine ki shnong ki dei ruh ki bym pat shym la don kyrteng satia hapoh ka thup khanasamari (census) jong ka ri India, ka jingbym don kyrteng ha ka khanasamari, ka pynlong ïa ki nongshong shnong ban duh ïa ki jingmyntoi kiba wan na ka sorkar.
Ka Company dewbilat jong ka Star Cement Lumshnong, lyngba ka tnat CSR ka la leh bun ki kam ba bha ha ka shnong Sakhri bad shnong Pandare, ban kyntiew ïa ki shnong ka la theh bun ki jingïarap sha ki nongshong shnong, mynta u bnai ïaïong jong une u snem 2023, kane ka company ka la pynïoh ruh ïa ka bor ding, da ki Solar Lighthing System ha man la ki thliew ïing bad ha ki ïingmane, kumjuh ruh la buh haduh khatsan tylli ki street light ha kiba bun ki jaka ha kine ki shnong, lah ban ong ba kine ki shnong mynta ki la ïoh ïa ka jingshai bor ding khamtam ha ka por mynmiet.
Ha ka jingjurip kaba dang shen ïa ka shnong Sakhri, u Mawphor, u la lap ba ki ïing ki sem jong ki nongshongshnong ki la ïoh jingshai ha ka por mynmiet bad namar ba ka dei ruh ka jaka kaba shit, kiba bun ki ïing ki la lah ban pyndonkam ïa ki pangkha, ban charge ïa ki mobile bad shibun kiwei kiwei ki kam ki la lah ban trei ha ka por mynmiet, kumjuh ruh ka shnong ka thaw ka la shai ha ka por mynmiet namar ka jingdon ki street light.
Ki nongshong shnong, ki la pynpaw ka jingsngew kmen bad sngew nguh ïa ka company Star Cement, kaba la wanrah (install) ïa kine ki solar lighting system ha ki ïing ki sem bad ha ki ïingmane bad ki street light ha shnong, ki la ong ruh ba ka jingïoh ïa ka jingshai na kine ki solar light ka la pynlah ïa ki khun ki kti kiba leit skul ba kin pule kot ha ka por mynmiet, kumjuh ruh ki la lah ban trei ban ktah ïa ki kam ha ka por miet bad pynsuk ruh ïa ki ha ka leit ka wan hapoh shnong ha ka por myn miet namar ka jingshai ki street light.
U Waheh Shnong jong ka shnong Sakhri, u bah Nildis Tongper, u la ai khublei ïa ka company Star Cement bad kumjuh ruh ïa u Kingshok Borah, uba dei u Manager CSR jong ka company Star Cement, uba la shim khia ha kaba pynbit pynbiang ïa ki kam ki jam khamtam ha kaba ïadei bad kane ka jingïoh bor ding Solar Light hapoh shnong “ Ka Company ka la isynei ïa ngi ki nongshong shnong kumta ka la wan buh da kine ki solar light, ha ki por ba mynshwa haba ngi ïaid ha ki lynti shnong ngi hap pyndonkam da ki jingpynthaba ding (torch light), hynrei mynta pat ngim donkam torch light shuh namar ki la don kine ki streetlight, mynta ngi la ïa long lem kumba long kiwei ki shnong kiba la ïoh ïa ka jingshai bor ding bad ngi kyrmen ban kin nang kyshan bad ïarap shuh shuh ïa ngi”
Ha kaba ïadei bad ka jinglong jingman ka surok, utei u Waheh Shnong, u la ïathuh ruh ba ka company Star Cement ka la ju ïarap ïa ki nongshong shnong ha kaba ka ju phah ïa ki puh shi lum (jcb) ban pynkhuid ïa ka surok ha ka por tlang bad kumta ki kali pickup kin sa lah ban ïaid bad ki kali ki lah ban ïaid tang ha ka por tlang katba ha ka por lyiur ba dei ka aiom slap ki kali kim lah ban ïaid.
Kumjuh ruh na ka liang u Secretary Shnong, uba dei ruh u Tymmenbasan jong ka Balang Presbyterian Sakhri, u bah Enos Sdor, u la pynpaw ka jingsngew nguh bad ai khublei ïa ka company Star Cement bad ïa u Kingshok Borah, namar ka jinglah ban wanrah ïa kane ka Solar Lighting System bad ki Street Light hapoh shnong bad ha ïingmane “Mynta ngi la lah ban pyndonkam ïa ki pangkha (Fan) hapoh ïingmane bad ngi la lah ruh ban pynlong jingïaseng ha ka por mynmiet, kane ka long ka jingkyrkhu” ong u ma Sdor.
U Management Representative jong ka company Star Cement, u Devander Bansal, u la ïathuh ba ka tnat CSR jong ka company ka la ïohi ba kine ki shnong kim pat shym la ïoh ïa ka bor ding na ka tnat bor ding ha ki shnong, kumta ka company ka la shim ïa kane ka synjam ban ai ïa kine ki solar light bad street light sha kine ki ar tylli ki shnong bad kane ka long ban kyntiew ïa ki shnong bad ka bor ding hi ka dei kaba ki paidbah ki donkam bha “ Ka jingïoh ïa kane ka solar lighting ha ki ïing ki sem ka ïarap ïa ki nongshongshnong, mynta ki nongshong shnong ki la lah ban trei ïa ki kam kiba da ka bor ding, ki lah ban peit TV, ki lah ban charge ïa ki mobile, ki khynnah skul ruh ki lah ban pule kot ha ka por mynmiet, ka jinglut ha kane ka project ka la kot sha ka T 35 lak haduh 37 lak tyngka bad na ka bynta kawei ka longiing ka dor jong kane ka solar lighting system ka long T.55,000 tyngka haduh T60,000 tyngka kawei ka ïing”
Utei u heh jong ka Star Cement, u la iathuh ruh ba na ka liang ka company ka ju ïarap ban pynkhuid bad maramot ïa ka surok ba ki briew kin lah ban ïaid, u la bynrap ruh “Lada ki briew ki ïakynduh ïa ka pang ka shitom, ki nongshong shnong ki hap ban shu bah ha tyrpeng ïa kiba shitom bad pynpoi shaduh surok national highway kaba jngai haduh kumba 5 kilo mitar haduh 7 kilo mitar, katno ka long kaba jynjar ïa ki, te katba lah hi ngi ïarap bad ngin nang ïai bteng ruh ban ïarap ïa ki paidbah ban kyntiew ïa ka imlang ka sahlang”

Leave A Reply

Your email address will not be published.