Nongpoh, Ïaiong 11: Ki dak ki shin ba ka dang don ka jingshalan tuh ïa u Dewiong ka la paw mynta ka sngi, ha kaba kawei ka Trok kaba don ïa u Number ML07 B 9154 mynta ka step ka hap sha riat ha ka surok kaba wan na Umrit ban mih sha Umling katba ka dang ïaid na katei ka surok ba la hap ha u pud u sam jong ka Shnoing Umling.
Kumba la ioh lum jingtip la ong ba katei ka Trok kaba la kylla bad hap shapoh ka riat ha katei ka surok ha ki bynta ba don khlaw ha Umling ka dei ka Trok kaba la kynnoh shalan beaiñ ïa u Dewiong bad ka dei ruh ka trok kaba wan kit ïa u Dewiong na ki thain West Khasi Hills da kaba pyndonkam ïa katei ka surok tang ban lait na ka jingshah kem ne shah bat ha ki bor jong ka aiñ daka pyndonkam ïa ka surok na Mairang ban mih sha Umrit bad na Umrit sha Umling sha ka surokbah National Highway-6 ha Ri Bhoi District.
La ïathuh ruh ba ha kane ka jinghap katei ka Trok sha katei ka riat bah ha Umling, u dribar katei ka trok u la mynsaw bad na ka liang ki nongrep bad ki paidbah nongshong shnong ka Umling kiba la sakhi ïa kane ka jingjia ki la leit ban ai jingïarap ban pynkit noh ïa u sha ka jaka ai jingsumar.
Halor kane ka jingjia, haba wad jingtip pat na u heh pulit ka Ri Bhoi, u Giri Prasad, u la pyntip ba ka don kane ka jingjia ha kaba ïa kane ka Trok yn tan noh mynta ka sngi bad na ka liang ki pulit kin pynngat ïa katei ka trok katkum ki kyndon jong ka aiñ halor kane ka jingkynnoh shalan tuh ïa u dewiong.
