Jurip ka FKJGP ïa ka surok PMGSY ba pynsahteng u Contractor

0

Nongpoh, Ïaiong 11: Da ka jingsngewkhia halor ka jingud jingnam ki paidbah ba ki kynduh jingeh na ka jingpynsahteng u Contractor ban pyndep siang rong ïa ka surok PMGSY ha ki shnong ba don ha ka thain Lymphuid ha Khappud ka Meghalaya bad Assam ba hap ha Mawhati Constituency, ki nongïalam ka FKJGP Mawhati Circle, mynta ka sngi ki la leit ban jurip ïa katei ka surok PMGSY ha kaba la lap shisha ba u Contractor u dang pynshakut ïa ka kam khongrem khlem da lah ban pyndep kumba la mang da ka sorkar.
Haba kane ka jingleit jurip la ïalam ruh da u president ka FKJGP Mawhati Circle, u Bah Tinus Rynjah bad la ïa don lang kiwei ki nongïalam bad ki dkhot ka Circle.
Haba hiar ban jurip ïa kane ka surok, ki nongïalam bad ki dkhot ka FKJGP ki la lap ba katei ka surok ka dei kaba la sdang ban pyntrei naduh u snem 2014 bad la dei ban dep tang haduh u snem 2020 bad kaei kaba pynsngewkhia ïa ka seng kumba la ud la nam da ki paidbah ka dei namar ka jingbym lah u Contractor ban pyndep ïa kane ka surok wat haduh kine ki sngi ba ki paidbah ki jynjar bad shitom ban ïaid lyngba katei ka surok.
Na ka liang u Bah Tinus Rynjah, haba kren sha ki Nongthoh Khubor u la ong ba ka seng ka dap shisha da ka mynsiem jong ka jingsngewkhia ha kaba ka sorkar ka la mang ïa ka pisa paidbah ban bit ban biang ki paidbah ha ka leit ka wan lyngba ka jingsiang rong ïa katei ka surok, hynrei kane ka long pat da khongpong ba u Contractor u ïalehkai ïa ka jingmyntoi ki paidbah khlem da pyndep ban siang rong ïa katei ka surok.
Ban myntoi ki paidbah da ka jingwan katei ka surok PMGSY ba la mang da ka sorkar kmie ban suk ki paidbah ha ka leit ka wan, u Bah Tinus Rynjah kum u nongïalam ka FKJGP na Mawhati Circle u la kyntu ïa ka sorkar ba ka dei ban bthah ïa u Contractor ban pyndep noh ban siang rong ïa kane ka surok, khnang ba kum ki paidbah kiba pyndonkam ïa katei ka surok kin suk ha ka leit ka wan bad ka kit ka bah ba u surok u long shisha u budlum jong ka ioh ka kot ki paidbah la ha sor ne nongkyndong, u la bynrap.

Leave A Reply

Your email address will not be published.