Ka Lympung ba 33 ka Sengkhihlang haka Shnong Kyrphei kaba hap hapoh ka Sengkhasi Tyrsad Circle

0

Jowai, Ïaïong 11: Ka Sengkhihlang ka wan ban pynsngew sha phi ki khun ka Bri u Hynniew Trep Hynñiew skum ba ka Sengkhihlang kan pynlong ïa ka lympung jong ki khun samla Sengkhasi Seiñ Raij haka 16/04/2023 ha ka Shong Kyrphei kaba hap hapoh ka Seng Khasi Tyrsad Cirlce.
Ïa kane ka lympung jong ka sengkhilang yn sdang naduh ka sngi 14 tarik u ïaïong 2023 bad kan kut ha ka 16 tarik.
Kumta ka sengkhihlang ka khot ka wer ia ki khun ka bri u hynñiew trep hynñiew skum ba ïawan sha kane ka lympung ban ïoh shibun ki kyntien sneng kyntien kraw bad ka nguh ka Dem na ki Riew tymmen Riew san na ki nongïalam Niam ki Daloi, ki Syiem, ki rangbah na ki Nongshat nongkhien ki khun ka bri u hynñiew trep hynniew skum.
Ha ka juh ka por ka Sengkhihlang ruh ka khot ka wer ïa ki President/Secretary jong ki tnad seng khasi bad Seiñ Raij bapher bapher ban ia wan sha kane ka Lympung. Kum ban shu pyn kynmaw, ka Sengkhihlang kam ïoh lad shuh ban pynlong ïa ka lympung jong ka ha kine ki 2 snem namar ba ka jingwan lyngshop jong ka jingpang khlam Covid-19 ha baroh kawei ka Ri India bad kumjuh ruh ia ka jylla, hynrei mynta u snem ka Sengkhihlang ka la ïoh baing ïa ka lad ban pynlong ïa kane ka Lympung ba shi sien shi snem jong ka.
Ïa u Mawbynna sahnam jong kane ka Lympung ba 33 ka sengkhihlang mynta u snem yn wan rah ïa u na ka Seiñ Raij Narwan na East Jaiñtia Hills District sha ka shnong Kyrphei ha East Khasi Hills District, ïa une u Mawbynna yn kit ïa u naduh ka sngi 14/04/2023 naduh ka por 7:00 Am un mih na ka shnong Narwan bad yn ïaid lynti lyngba kine ki shnong naduh na Tuber, Muthlong (Phramer), Ialong, Jowai, Mukhla kiba hap hapoh Jaiñtia bad naduh ka shnong Mawryngkneng, Ladsmit, Marbisu, Mawngap, Mawphlang kiba hap hapoh Khasi Hills.
Ka Seng ka kyntu ia ki shnong kin pdiang sngewbha ïa u Mawbynna sahnam haman la ki shnong ba u ïaid lynti da ka nguh ka dem ka duwai ka phirat tang 10 minute kawei kawei ka shnng ka por ban pdiang sngewbha ia u Mawbynna.
Ka kyntu ruh ia ki tnad Sengkhasi bad Seiñ Raij bapher bapher kiba bud ïa u Mawbynna sahnam ha ka sngi 14/04/2023 kidei ban ïa mih biang por khnang ba yn lah ban pynpoi ïa u Mawbynna sahnam ha ka por ba la buh ka por ba biang, ha ka juh ka por ruh ka Sengkhihlang ka kyrpad ïa ki khun samla ka Sengkhasi Seiñ Raij ba kin ïa ïaid don akor ha ka por ba bud ïa u Mawbynna ym dei ban leit kyrkieh ne kyntur kyrkieh hynrei ki dei ban ïaid ryntih ryntih khnang ban lait na kano ka jing jia ba sngewsih bad ban lait na ka jingsakut kali ha lynti ha syngkieñ. Pynkut ka kyrwoh na u ma S. Sari Publicity Secretary Sengkhihlang.

Leave A Reply

Your email address will not be published.