Nongpoh, Ïaiong 11: Da ka jingshim khia ki bor pulit ka Ri Bhoi ban buddien halor ka jingshalan tuh ïa u drok lyngba ka surokbah National Highway-6 ha Ri Bhoi, ki Pulit ka Ri Bhoi lyngba ka Anti-Narcotics Task Force (ANTF) team mynta ka sngi ki la ioh biang ban kurup ïa u drok na kawei ka Tourist Bus kaba don ïa u Number AS 24C 9855 kaba dang wan na Silchar ban leit pynhap sha Guwahati.
Ki pulit ka Ri Bhoi ki la ioh ban kurup ïa u drok bad la ioh ba kem ïa ki ar ngut ba suba don kti, ka dei hadien ba ki la ioh jingtip shaphang katei ka Tourist Bus bad da ka jingpynap shrip ha Umling ha ka por 8.30 baje mynstep ki la ioh ban bat ïa katei ka Bus bad kurup ruh ïa u drok ryngkat ka jingkem ïa kitei ki ar ngut.
Kitei ki ar ngut ba la sha kem ki kynthup ïa u Rohit Raj Pandey (22) bad u Bipul Kumar (19) kiba dei na ka jylla Bihar.
Kumba la pyntip da ki bor Pulit ka Ri Bhoi, la ong hadien ba la pynlong ïa ka jingtohkit hakhmat ka jingsakhi lang kiwei lyngba ki kor ki bor la pynthikna ba utei u drok u dei u drok Marijuana uba don ka jingkhia 8.6 kg. La ong ruh nalor u drok ba ki la ioh kurup, ki pulit ki la ioh kurup ruh ka Mobile phone bad la kem ruh ïa kitei ki ar ngut na ka bynta ka jingtohkit kaba kham bniah.
Shuh shuh, na ka liang ki bor pulit ka Ri Bhoi hadien ba la ioh kurup drok bad la kem ïa kitei ki ar ngut ki la pynngat ïa kitei ki ar ngut katkum ki kyndon jong ka aiñ lyngba ka NDPS Act.
