Rai u Bah Michael Kharsyntiew ban ïakhun Independent na North Shillong Constituency

Shillong, Rymphang, 04: U Bah Michael Kharsyntiew ha ka sngi Saitjaiñ u la rai ban ïakhun kum u kyrtong Independent na North Shillong Constituency ha ka elekshon sha ka Iingdorbar Thawaiñ ka Jylla ka ban sa long ha ka 27 tarik, Rymphang, 2023 hadien ba u la shah pynduh tiket ha ka Bharatiya Janata Party (BJP).
Ka BJP kaba la pynbna paidbah ïa ka thup jong ki kyrtong ha ka 2 tarik mynta u bnai ka la ai tiket ïa u Bah Mariahom Kharkrang u Ophisar IPS ba la shongthait ban ïakhun na North Shillong Constituency.
Ha ka jingïakren bad ki lad pathai khubor, u Bah Michael Kharsyntiew u la ong, “nga duh tang ïa ka shab hynrei nga khlem duh ïa ka jingieid bad ïa ka jingshahniah. Nga la trei minot saw snem kynthih bad nga la ïoh ïa ka jingshahniah na ki paidbah. Naduh u 2019, 2020 na la trei na ka bynta u paidbah bad nga la long uba la ai ka jingshakri kaba hok ïa ka party bad nga khlem mih na kawei ka party sha kawei pat ka party bad nga la ïaineh hapoh ka Party.”
“Ha ka jingïaid lynti ban shakri ïa ka party nga la long uba aiti lut ïa ka party hynrei nga sngewlyngngoh wat haba nga la trei shitom la saw snem kynthih, imat don mano re mano, imat ka don kaei re kaei, ha ka lynti kaba nga dei ban ïoh ïa ka tiket, la don mano re mano ba la leh da kawei ka lynti,” la kynnoh u Bah Michael halor ka jingshah pynduh tiket ha ka BJP.
“Nga kyntu ïa baroh ki paralok bad ïa ki nongkyrshan ba ngim dei ban duh jingkyrmen namarba ngan ïai don ryngkat bad phi bad nga kwah ban ong ïa ki ruh ba kin long kiba husiar. Lada ïa nga uba la trei shitom na ka bynta ka party ki dang leh kumne, kaei pat ka ban jia ïa kiwei kiwei bad kaei ka ban jia ïa u paidbah,” u la ong.
Haba kynthoh halor ka jingai tiket ïa u Bah M. Kharkrang, u Bah Kharsyntiew u la ong, “nga la neh ha ka party saw snem bad nga la trei ban kyntiew ïa ka jingpynrung kyrteng ïa ki dkhot hapoh ka party bad nga la leit sha ki prokram kiba bun, hyrnei don ki briew kiba dang shu pynïasoh sha ka party tang saw bnai ki la kiew sha ka kyrdan Spokesperson, State Executive Member bad mynta ki ïoh syndon ïa ka tiket,” bad bynrap “ai ba ka jingstad jong u paidbah un sa shim ïa ka rai.”
U Bah Michael Kharsyntiew u la ïakhun na Umsning Constituency ha u snem 2018 bad shah rem noh.
Katkum ba la paw ha ki lad pathai khubor, ka thymmei khubor na ki nongïalam ka BJP na Delhi ki la ong ba u Bah Kharsyntiew u la shah pynduh tiket namar ka jingkynoh ba khlem nongrim pyrshah ïa ki arngut ki nongïalam ka party, kiba la shim ïa ka pisa ban ai tiket ha ka elekshon kaba la long ha u snem 2018.
Halor kane ka jingkynnoh jong ki nongïalam ka party na Delhi, u Bah Michael Kharsyntiew u la thad paidbah ïa ka kyrteng jong u State President barim ka BJP u Bah Shibun Lyngdoh bad u General Secretary barim u Bah Bashailang Khongwir kiba la pdiang ïa ka pisa kaba u la siew.
Ka BJP ka la phah tohkit ha ka Disciplinary Committee bad lap ba kine ki arngut ki la donkti ban shim ïa ka pisa tang kum ka jingai sngewbha.
U Bah Michael Kharsyntiew u la wanrah ruh hakhmat ki lad pathai khubor ïa u Chairman jong ka Disciplinary Committee uba khlieh ïa ka jingtohkit.
U Chairman jong ka Disciplinary Committee u Bhagwati Prasad Goenka u la ong ba ki nongïalam ka BJP ki la buh khop khop sharud ïa ka kaiphod.
“Haba nga la buddien ba ïa u Bah Michael dei ban pyllait noh ha ka Executive Committee, ki nongïalam jong ka party kiba peit ïa ka Meghalaya ki la bthah ba ngam dei shuh ban dang buddien ïa kane ka kam.
U nongpeit ba mynshwa jong ka Jylla Meghalaya u dei u Nalin Kohli.