Shillong, Rymphang 04 : U National Vice President ka NPP, Bah Prestone Tynsong ba dei ruh u Symbud Myntri Rangbah ka Jylla, ha ka sngi Saitjaiñ u la ong ba um sngew ïahap satïa ïa ka jingleh jong u Nongïalam ka Liang Pyrshah ka Iing Dorbar Thawaiñ ka Jylla, Dr. Mukul Sangma ban ïakhun haduh ar jaka ha kane ka elekshon ban wan.
Katkum ka jingong jong u, ka Riti Synshar jong ka Ri kam shah ïa u MLA ban shakri ar ne lai tylli ki constituency.
Lah ban kdew hangne, u Dr. Mukul Sangma ba dei u MLA na Songsak u la rai ruh mynta ban ïakhun sa na Tikrikilla.
“Ha ka jingsngew shimet jongnga, u (Dr. Mukul) u la dep leh ïa kane ha ka samoi ba la dep. Kumta lada u bteng ban leh biang ïa kajuh, nga tikna ba ki paidbah jong baroh ar tylli ki constituency kin ym don shuh ka jingshaniah ha u,” ong u Bah Prestone haba kren bad ki lad pathai khubor.
“Kane kadei namar lada ka Riti Synshar ka ri ka ailad ba phin shakri baroh ar tylli ki constituency, nga ruh nga lah ban aireng lang na ki ar ne lai tylli hynrei mynta lada phi ïakhun na baroh ar jaka bad phi hap ban iehnoh kawei pat bad resaiñ kadei ka kam kaba ym sngew ïahap satia. Kumta, ha ka nongrim treikam jongnga bad ka jingsngew jongnga, nga mynjur satia lane ngam pdiang satia ban ïakhun na ki ar jaka lane bun tylli ki constituency ha kajuh ka por,” u la ong.
Ha ka elekshon MLA ha u 2018, u Dr. Mukul u la jop na ki ar jaka, kata na Ampatri bad ruh na Songsak. Hadien pat u resaiñ na Ampati ban ailad ïa ka khun jong u ka Miani D Shira kaba dei ruh ka nongmihkhmat ba mynta na katei ka constituency.
