Kane ka sorkar ka la pynlut phut palat ïa ka pla tyngka bad sa jynjar u paidbah: MN Mukhim

Shillong, Rymphang 04: U kyrtong ka Hill State People Democratic Party (HSPDP) na Mawkynrew Constituency u Bah Martle Mukhim ha ka sngi Saitjaiñ u la ong ba ka jinghiar arsut ka jylla ha ki liang baroh ka dei namar ka jingbym don ïa ki nongsynshar kiba don ka jingkit khlieh ban kyntiew ïa ka jylla hynrei kiba shu lapmiet ban pynlut phut ïa ka pisa u paidbah ha ka jingthung ïa kita ki Chairman, ki Vice Chairman, ki Co-Chairman, ki Consultancy ha ki tnat bapher bapher kaba wanlam pat ïa ka jinghiran ïa ki paidbah ka jylla.
Haba kren sha ki lad pathai khubor hadien ba u la mih na ka jaka thep kyrteng na kamra u Returning Officer ha ka ophis u Deputy Commissioner u la ong ba kane ka jingleh lutphut ka sorkar ïa ka pisa u paidbah ka pynstang ïa ka pla pisa ban ïoh kyntiew ïa ka jylla na bynta ka jingmyntoi u paidbah.
Haba ïadei bad ka jingkynthoh ki kyrtong kiba ïakhun pyrshah ïa u ba u Bah Martle u la noh than ka rta ban long u MLA, u Bah Martle u la ong ba kine ki dei tang ki jingkynthoh ban ïalam bakla hynrei ki paidbah ka Makynrew ym tang wei ne ar hynrei da ki hajar ngut ki la ïohi ba u dang biang bha ka rta ban ïakhun bad u ruh u sngewthuh shai ba ka met jong u ka dang biang bha ba ban kit ïa kane ka lyngkor nongmih khmat.
Haba kylli haduh katno u don jingsngew skhem ban ïoh biang ka jingjop ha kane ka kynti kaba mynta u bah Martle u la jubab ba na ka liang jong u u la sngewthuh lupa ba ki paidbah da ka jingieid namar ki ïohi ïa ka jinglah jong u ban kit ïa kane ka lyngkor kin sa phah biang ïa u sha ïing dorbar assembly.