Shillong, Rymphang 4 : Ka BJP mynta ka Sngi Saitjaiñ ka la kob ba ki paidbah jongka jylla ki kwah ba kan ïalam ïaka sorkar ba thymmai ha kane ka jylla Meghalaya hadien ka 2 tarik mynta u bnai.
“ Ki paidbah ka Meghalaya ki la phai khmat sha ki thong treikam bad jingaiti lut jong u Myntri Rangbah duh ka ri u Narendra Modi ha ka jingpyndep hok ïaki jingkular bad khamtam eh ban wanrah ïa ka roi ka par bad ka jingkiew jongka ri ha ki liang baroh” ong ka kyrwoh na ka BJP.
Ka kyrwoh na ka BJP ka la pynpaw ba ki jylla kiba ïalam ïa ka jingsynshar da ka BJP ha kane ka ri ki la sakhi ïa ka jingtrei jong ka sorkar na ka bynta ki paidbah. Ki paid Meghalaya ki la ïohi ïa kane bad hadien ba ki la ïoh bun ki jingmyntoi na ka sorkar pdeng mynta ki phai khmat sha ka BJP.
Halor ka jingjied ïa ki kyrtong ka BJP ka pynpaw ba ka jied ïa ki kyrtong jongka da ka jingshaniah skhem ba kin jop don burom. La jied ïa ki kat kum ka jingtreikam jongki bad khamtam hadien ba la wad bniah bad ki dei kiba la mon da u paidbah.
Halor ka jingkylli ba ki don pat kiba duh tiket na ka BJP hynrei mynta ki la mih noh bad rai ban ïakhun kum ki kyrtong shimet, ka BJP ka la pynpaw ba kane ka ju jia hi ha ka saiñ hima namar hadien ba ki la duh tiket khlem pep kin mih ki jingkynnoh kiba bun rukom bad kin phet noh na ka BJP ruh. Ka BJP kam ju sngew ei ei halor kiba kum kine ki jingjia.
“ Ngi dei ki briew bad ngi don ka jingsngew bad kine ki jingleh ki dei kiba ju jia barobor” ong ka BJP.
“ Hynrei ngi pat kiba don ha ka BJP ngi ngeit bad trei na ka bynta ban tei ïa ka jaidbynriew lyngba ka party ym ba ngi trei na ka bynta jongno jongno shimet. Kumta ka party ka thrang ba baroh ki dkhot jongka ki dei ban ïatrei lang wat la ki duh tiket ruh. Hynrei ha ka ri synshar paidbah uwei pa kawei ki don la ka hok ban jied bad rai laitluid katba ki mon. Hynrei ka BJP ka dei kaba la aiti lut na ka bynta ki paidbah bad baroh kiba don ha ka BJP ki bud ïa kata ka nongrim”.
