Nongtoiñ, Nailur 10: Ki 21 tylli ki shnong ka West Khasi Hills, ki la rai ban ‘boycott’ ne kyntait ïashimbynta ha ka elekshon MDC ban wan jong ka Khasi Hills Autonomous District Council (KHADC), namar ka jingkynnoh shah rah jubor na kawei ka constituency sha kawei pat ha ka jingpynbeit constituency thymmai jong ka Council dang shen.
Kine ki 21 tylli ki shnong ki dei kiba hap ha ki lai tylli ki Polling Station ka Mawshynrut constituency, kiba kynthup ïa ka Misei, Mawsmai bad Langdongdai Polling Station. Ïa kine ki shnong la rah noh sha Rambrai-Jyrngam constituency.
Dang shen, kine ki Shnong ki la thaw ïa ka Joint Action Committee (JAC) ban pyrshah jur ïa kane ka sien jam jong ka KHADC haba kynnoh ba ka dei ka jingpynkynriah jubor jong ka Delimitation Committee ba khlieh da u Bah S.Kharsyiemlieh khlem ka jingmynjur u paidbah.
Ka sur ban ‘boycott’ ïa ka elekshon ka la mih na ka jingïalang paidbah jong ka Joint Action Committee kaba long hynne ka sngi ba ar ha shnong Langdongdai West Khasi Hills.
“Ki 21 shnong ki la rai ban nym ïashimbynta ha ka elekshon MDC ban wan lada ka KHADC bad ka Selection Committee ba la khlieh da u Bah PN Syiem kum Chairman, kam sngap ïa ka sur jong ki 21 shnong”, ong ki Nongïalam ka JAC ha ka jingïalang.
Kine ki Shnong ki la buh ïa ka jingdawa na u Chief Executive Member (CEM) ka KHADC Bah Pynïaid Sing Syiem bad Dy CEM Bah PN Syiem ban pynshai bad ba u dei ban jubab bad pynshai balei um lah ban ai jingtip sha ki paidbah lyngba ka jingthoh sha ki nongïalam shnong, ba kin pyrkhat shwa ban shim ïa kano kano rai halor kane ka kam kaba khia na ka bynta ki paidbah.
Ïa kane ka rai jong ka JAC la kyrshan da baroh ki Dorbar Shnong, ki seng longkmie, ki seng Samla bad ki Sengbhalang jong ka thaiñ Nongtrai, kiba la byrngem ruh ban pynlong da ka jingïakhih lada ka KHADC ka pynïaid shakhmat ïa ka jingpynkynriah constituency.
Ha kane ka jingïalang, ki paidbah ki la ïanoh synñiang ruh da ka pisa sha ka Joint Action Committee ba kan nang pyntyllun shakhmat ïa ki jingïakhih halor kane ka jingshah pynkynriah constituency.
