Nongpoh, Nailur 10: Ka jyllei jong u drok haka imlang ka sahlang, kala pynlong ïa kiba bun ki paidbah ban kren beit tang shaphang u drok haba don kano kano ka kam tuh kam thiem, ki kam sniew ba lai phew jait kaba la wanrah ka jingsyier ïaka imlang ka sahlang khamtam ki kynthei khynnah.
Kane kam dei ka kam thamula ban shu mutdur ba u drok u long kum kiwei ki jait jingdih buaid hynrei u dei u jait jingdih u ba kham pher namar um ailad ïa u briew bala mad ïa utei u jait jingdih ba un lait na u kynjri, haduh ba bun naki samla ki bym iohlad ban thied ki hap ban shu tuh, lute bad leh ki kam sniew ba lai phew jait tang ban ioh pisa.
Lah ruh ban ong ba ka Ri-Bhoi District kaba dei ka khyrdop ban rung sha ka jylla bad ruh ban mih naka jylla kadei kawei naki district kaba la jyllei bha u drok kumba ki pulit kila ju ioh ban kem naka por shaka por ïaki nongkhaii bad kumjuh ruh ki nongdih drok.
Ka jingjia shah tuh 2 tylli ki dukan mynta ka sngi ha Nongpoh, kala pynlong ïa kiba bun ki paidbah ban ïakren beit tang shaphang u drok, bad ym lah ban len kiba bun hi ki kam tuh kam thiem la ju leh da ki nongdih drok la kadei kaba ioh kem da ki pulit ne ki paidbah, namar bun bah ki kam tuh ki ju jia naka por shaka por la ka long haki dukan ne ka jingshah tuh bad shah kyndang ki kali bad wat ki skul pule kumba dang shen kawei naki skul ha Jyntru kala shah tuh haduh 10 tylli ki kor computer haki runar bym lah ban ithuh.
U nongthoh khubor jong u Mawphor u la pyrshang ruh ban ïakren bad katto katne ki paidbah kiba la ïakren shaphang ka jingshong syier ki dukan bad ki iing ki sem, kiba ju shah tuh bad shah kyndang bad ka kyrteng hi kaba mih hakhmat ka dei ki nongdih drok, namar ka jingjyllei jong ki nongkhaii bad ki nongdih kala long kaba shyrkhei ha ka them Ri-Bhoi.
Lyngba ka jingshah tuh kaba la jia mynta ka sngi ha Sor Nongpoh bun naki paidbah kila pynpaw ba hap ban husiar naduh ki iing ki sem bad ki dukan, namar ki runar kim salia ban rung bad kyndang ha kano kano ka por khamtam haka por ba ki paidbah ki dang don hapdeng ka jingkynoi thiah jong ka miet.
Lehse ka tnad pulit kaba pynlong ruh ka jingtohkit mynta kan lapdien ïa kitei ki runar ba donkti ha kitei ki kam ban tehlakam ïaki kam tuh kam thiem bad ba ki paidbah kin nym shong syier haka imlang ka sahlang.
