Shillong, Nailur 10: U nongïalam ka liang pyrshah u Dr. Mukul Sangma u la kynnoh ïa ka sorkar Meghalaya Democratic Alliance ba la ïalam da ka NPP ba ka la pyndkoh bad pynduh bor ïa ki autonomous district council (ADC) ha ka jylla.
“Nga pynrem ïa kane ka jingleh jong ka sorkar ba ka pyndkoh bad pynduh bor ïa ki ADC. Kane ka jingpyndkoh pynduh bor ïa ki ADC ha ka bynta jong ki jinglah haba ïadei bad ki jingjubab ïa la ki jong ki kamram kiba long katkum ki riti synshar jong ka ri India kam dei kaei kaei, hynrei kaba long pyrshah ïa ki nongshong shnong,” ong u Sangma sha ki lad pathai khubor.
U la kylli ruh ba ki ADC kidei ki khun jongno lada ka sorkar kam lah ban shim ïa ki jingithuh jingkitkhlieh ïa ki jingduna ki lad ïoh jingkyrshan ba la mad da maki.
Une u Myntri Rangbah barim ka jylla haba ong ïa katei u la phai ruh sha ka jingkyrduh pisa ba la mad da ki lai tylli ki ADC khamtam ka GHADC bad JHADC.
U Sangma u la ong ba ha ka por samoi treikam jong u, ka sorkar barim ka la shim bun ki sienjam halor ka jingdonkam ban ai ki jingkyrshan ïa ki ADC.
“Kumta balei phin shem ba katno tylli ki jingïalang kiba la pynlong, katno tylli ki shithi ki la leit na ka meij jong u Myntri Rangbah bad katno sien ki ophisar na ka jylla ki la leit sha Delhi ban ïasyllok ïa kane kam bad dei kane kaba la pynsngewthuh ïa ka sorkar halor ki jingkitkhlieh ban ïarap ïa ki ADC naba ngim don ïa ka Panchayati Raj system bad dei halor kane ka nongrim ba la mynjur ïa ka special central assistance na ka bynta ki ADC bad halor kane ka dei ruh ka kamram jong ka sorkar ban buddien bad ban pynïoh ïa baroh ki fund khnang ba ki district council kin don pisa ban pyntyllun ïa ki kam. Mano ba la pynsangeh ïa ki bad balei ki la pynsangeh ïa ki?”
“Ki ADC ki dei ki khun jongno? Kane ka mut ba ki don ka jingmut kaba sniew bad kaba bakla, ka jingthmu kaba la dep rai lypa ban pyntlot bor ïa ki district council ne ban ong ba ki rukom treikam ki ADC ki la pulom. Hato ki pyrshang ban ong ïa kane?” u la kylli.
Haba ong ba kane ka dei ka kam kaba sngewkhia, u Sangma u la ong, “Kumta ngi donkam ban shim khia naba ki nongshong shnong jong ka jylla ki kwah ban ïada ïa ki kyndon jong ka khyrnit kaba 6 jong ka riti synshar ka ri India, ngi dei ban ong baroh ba ngin ym ban shu sngap jar ne ban shu peitkai. Kam dei tang ka kam jong ka GHADC hynrei ka dei ka kam jong baroh ki ADC.”
