Kular u MP ban ïakren bad ki MP ka NE ïa ki jingdonkam ba kyrkieh jong ka NEIGRIHMS

Shillong, Nailur 10: U MP ka Congress na Tura u Saleng A Sangma u la leit ban jngoh ïa ka North Eastern Indira Gandhi Regional Institute of Health and Medical Sciences (NEIGRIHMS) hadien ba u la shah jied kum u dkhot ka Governing Council dangshen. U Sangma u la lum ruh ka jingïalang ha kaba ha u la ïathuh shaphang ka kyrdan jong ka NEIGRIHMS. U MP u la ïoh ban ïakren bad kiba bun ki nongtrei ba kynthup ïa ki head jong kiba bun ki department bad ka section jong ka NEIGRIHMS.
Ha ka jingkren u MP u la pynpaw ba u dap da ka jingkmen ban wanjngoh ïa ka NEIGRIHMS bad ka jingthmu ba kongsan jong kane ka jingwan jngoh ka long ban sngewtuh ïa baroh ki bynta bad ki kam kiba ktah ïa ka NEIGRIHMS. U la ong ban lah kyntiew ïa kane ka jaka sumar ka long tang ban ïakren bad ka sorkar pdeng ban pynthikna ba ka NEIGRIHMS kan kiew kum kawei ka jaka sumar bad ban don ki tiar sumar kiba bha na ka bynta ki nongshong shnong kane ka thaiñ shatei lammihngi.
U Director Prof Nalin Mehta u la ïathuh ha u MP shaphang ki bynta kiba ktah ïa ka NEIGRIHMS kaba kynthup ïa ka jingduna ki nongtrei, ka jingdonkam ban don ka jingïaryngkat kyrdan bad ka AIIMS New Delhi bad PGIMER, Chandigarh, bad ka jingdonkam ka jaka ban shna ïa ka Guest House na ka bynta ki nongpang kiba donkam. U la banjur halor ka jingdonkam ban pynïoh ka kyrdan jong ka Institute of National Importance (INI) ïa ka NEIGRIHMS ban ïarap ban ïakhun ïa bun ki jingeh.
U MP u la kyrpad ruh ïa ka jaka sumar ba kan aiti ka jingthoh kaba lyngkot shaphang ki jingdonkam khnang ba un lah ban shim ki sienjam ban pyndep ïa kine ki jingeh kham kloi katba lah. U Sangma u la ong baroh kawei ka thaiñ shatei lammihngi ka phai sha ka NEIGRIHMS naba kadei ka jaka sumar bad jaka hikai kaba bha tam (Hospital and Teaching Institution) bad kumta un shim khia ïa kane ka kam kham kloi katba lah.
Ha ka jingïalang, u la ong ba un iehnoh shadien ïa ki jingsngew party bad ban don ka jingïasyllok bad ki Members of Parliament (Lok Sabha) na kiwei pat ki jylla kane ka thaiñ shatei lammihngi kumjuh ban lah ïarap ban shim ka rai kaba kut bad ba skhem jingmut ïa kine ki jingeh ba kynduh da ka NEIGRIHMS, kaba la khmih da kane ka jaka sumar naduh ba la buh ïa ka ha kane ka thaiñ.
U MP u la pynpaw ka jingkmen ba ki nongshong shnong ka Meghalaya bad baroh kawei ka thaiñ shatei lammihngi ki la ïoh jingmyntoi na kane ka jaka sumar bad kumta u la kut jingmut ba dei ka kamram jong u ban kyntiew shuh shuh ïa kane ka jaka sumar.
U la kular ruh ba un shim khia ïa ka jingkyrpad ka NEIGRIHMS ban pynïoh ka jaka na ka bynta ban shna ïa ka guest house hajan NEIGRIHMS ban ïakren bad ka sorkar Meghalaya, naba kane kan ïarap shibun ïa ki nongpang.