Shillong, Rymphang 07 : U Myntri Rangbah ka Jylla ula ïathuh ba ka sorkar ka la rai ban pynsangeh shwa ban tei ïa ki skywalk ha kane ka nongbah Shillong bad u la pynpaw ruh ba u don ïa ka jingangnud ban pynkylla ïa ka Shillong kum ka ‘Nongbah ki nongïaid kjat suda’ (Walkable City).
Ka project Skywalk ka dei kaba la tyrwa kum shibynta na ki sienjam ban weng ïa ka jingkhapngiah jong ka Nongbah.
“Ngi la don jingthmu ban buh ïa ka skywalk ha kawei na ki jaka hynrei la ai jingmut ïa ngi ban nym pat pyntrei ïa ka kam namar kan nang pynjur shuh shuh ïa ka jingdheng kali katba ka kam ka dang ïaid” ong u Myntri Rangbah haba kren ha ka jingïalang ba long mynta ka sngi Balang.
“Katba ngim pat ïoh ïa ki lad ki lynti ban pynïeng ïa ki kali ban pynduna ïa ka jingkhapngiah, ka jingshna ïa ka skywalk, ha kane ka por hi la hap ban pynsangeh shuwa namar ka jingdheng kali ha kine ki shisnem shiteng ban wan kan sa nang jur lada ngi sdang noh ïa ka jingtei (skywalk) ha kine ki jaka bala ithuh” ula ong.
U Myntri Rangbah ula pynpaw ïa ka jingangnud ban pynkylla ïa ka Shillong kum ka “Nongbah ki nongïaid kjat suda” bad ong “Nga ngeit ba ka Shillong ka lah ban long ka Nongbah ki nongïaid kjat namar ki shnong ki thaw kim dei kiba jngai bad kumta lada ngi don ïa ki lynti ïaid kjat kiba lah ban shakri ïa ki paidbah ka Jylla, nga tharai bun ki paidbah ka Shillong kin jied ban pynïeng ïala ki kali ha ki jaka pynïeng kali bad sa ïaid kjat noh”.
U Conrad ula pyntip ba ka Sorkar kala dep shna map kumba 15 Km haduh 18 Km ha baroh kawei ka Nongbah Shillong khnang ban ïoh pynïasoh ïa ki lynti ïaid kjat. “Nga la khot ïa ki riewshemphang bad kum kine kiei kiei kila jia mynta” ula bynrap.
Ha kajuh ka por, u Myntri Rangbah ula pyntip ba ka Sorkar kala don jingthmu ruh ban nang pynbun ïa ki jaka pynïeng kali, ki ban ai jaka lem ïa ki nongshong dukan madan, ban weng ïa jingkhapngiah ka nongbah. Kine kin sa mih ha ki jaka jong ka Sorkar kiba la shu ïehshrah la bun bun snem.
Nalor kane, u Myntri Rangbah ula ong ba ka Sorkar kala shem ba ka jingkhapngiah ha ki thain Police Bazaar bad Iewduh kala jia na ka jingbym lah pynïaid bha ïa ki bos bad ki taxi bad kane ruh ka dei ka jingtynjuh kaba khraw namar ba kam don satia kiwei pat ki jaka ïa ki bos bad ki taxi ba kin pynïeng.
“Kumta , ka lynti hi ban lah weng ïa ki jingkhapngiah ha kine ki jaka ka dei tang ban wanrah ïa ki jaka kaba ki bos bad ki taxi ki lah ban ïeng bad ap briew” ula bynrap.
U pyntip ba ka Sorkar kala ïakren mynta bad ka Sorkar India ban pynphai noh ïa ki jaka ba long trai da ka Contonment Board sha ka Sorkar bad ïa kine ki jaka yn pynkylla kum ki parking zone bad waiting zone ïa ki bos bad ki taxi.
