Da ïoh tang 8,000 vote na ki Constituency bym don MLA NPP ngi la jop suk, kob ka kyrtong

Shillong, Rymphang 07 : Ka kyrtong MP jong ka NPP na Shillong seat, Dr. Ampareen Lyngdoh ha ka sngi Balang ka la kob ba lada ka ïoh tang 8,000 vote na ki constituency ba ka NPP kam don MLA, ki la tikna lypa ba kin khur suk ïa ka jingjop.
Haba kren ha ka jingïalang ha Sohïong, kane ka kyrtong kaba dei ruh ka Myntri Sorkar ka jylla ka la ong, “Nga la shim jingkheiñ antad ba lada ïoh tang 8,000 vote na ki constituency ba ka NPP kam don MLA nalor ki vote na ki constituency ba ka party ka don ïa ki MLA kata ka la biang ba ngin rah suk ïa ka jingjop.”
Katkum ka jingong jong ka, na ki 36 tylli ki constituency kiba don ha ka Shillong parliamentary seat lada ka ïoh 8000 vote na ki constituency bym don MLA NPP bad 10,000 vote na ki constituency ba don MLA ka party, da kaba suk kan ïoh 3.20 lak vote bad kane ka la pyntikna lypa ban poi sha ka thong.
Shuh shuh ka la ong ruh ba ynda ka la jop, kam kwah ban kren shwa ïa ki skim hynrei kan rah shwa ïa ki ishu jong ka Jaidbynriew ha Parliament ym ha surok. “Ngam tieng ngan kren beit,” ka la ong.
Ka kyrtong ka la ong ruh ba kam don por ban ïatai nia ïa kito kiba kren beiñ ïa ka ha ki social media hynrei ka kob pat ba lada ki sngew rangbah ki dei ban wan shakhmat ban ïakren ym ban shu thad ha social media.
“Nang hylla hangto khlem khmut khlem khmat ngam tieng, kren katba phi mon ngan ïaid ha la ka lynti. Lada phi don jingeh ïanga wan da ka kyrteng ba shisha hakhmat jongnga,” ka la ong da kaba bynrap ba katba ki nang kren katta ka nang ïohbor.
Ha kane ka sngi, ka kyrtong ka la ïakynduh ïa ki nongïalam ba hakhmat eh ka NPP jong ka Sohiong Block ban pynkhreh na bynta ka elekshon MP.