Nongstoiñ, Rymphang, 7: San sngi hadien ba ka (L) kong Wansaralin Wanñiang na ka shnong Tiehsaw West Khasi Hills ka la shah pynïap dusmon ha u lok barim jong ka u ba la tip kyrteng kum u Biangkupar Nongsiej na ka shnong Lawse, ka Dorbar shnong ha ryngkat ka Seng samla shnong ki la pynlong da ka jingïaid rally paitbah mynta ka sngi, kum ka daw ban pynrem halor kane ka jingjia.
Ki paitbah jong ka shnong naduh ki longkpa ki longkmie, ki samla bad haduh ki khynnah kiba rit ki la ïamih ryntih ha katei ka madan shnong Tiehsaw shuwa ban sdang ïa ka jingïaid rally. Ki spah ngut ki paitbah na ki shnong ba mar jan kum na Mawrusyiar, Upper New Nongstoiñ, New Nongstoiñ, Ladweitang, Mawïonglumsyntiew, ki nongïalam bad ki dkhot jong ki sengbhalang kum ka KSU, HYC bad kiwei kiwei, ki la wan ban ïasnohkti lang ha ka jingïaid rally ban pynrem bad dawa na ki bor ka aiñ, ba ki dei ban pynsajia da kaba tyngeh bad pynngat ïa utei u runar ha ki kyndon pynïap briew ba shyrkhei bad ban set along shi jingim.
Ha kajuh ka por ha shuwa ban ïaid rally la pynlong ka jingïalang ba lyngkot ha kaba la pynïaid da u bah M.Dkhar sordar jong ka shnong Tiehsaw bad la ïoh ban ai ïa ka jingkren lyngkot da u Doktor P.Lyngkhoi Joint Director barim ka tnad ka koit ka khiah bad la pynlong ruh ïa ka jingsngap jar kaba shi minit kum ka jingkynmaw bad sngew lem ïa ka jingkhlad noh katei ka longkmie.
Hadien ka jingkren jong u Dr P.Lyngkhoi la sdang ïa ka jingïaid rally naduh katei ka madan haduh pdeng sor Nongstoiñ sha Ladweitang haduh ban da poi ha khyrdop jong ka Ophis u Deputy Commissioner ka West Khasi Hills, ha ryngkat ki lama ïong bad ki banner ba la thoh ïa ki kyntien pynrem ïa utei u riew bymman bad ka jingdawa ban pynsajia bad set along shi jingim.
Haba la poi ha khyrdop jong ka ophis u Deputy Commissioner na ka liang u sordar bad ki riew rangbah ki la kyntu ïa ki paitbah ba kin longjai jai ha kaba ki paitbah ruh ki la sngap jar bad kohnguh ïa ka jingkyntu jong ki. Nalor kata na ka liang ka Dorbar shnong ka la jied ïa ki katto katne ngut ki rangbah ryngkat u sordar bad kiba haïing jong ka longkmie ba la khlad, ba kin leit ban ïakynduh ïa u bah Garod L.S.N.Dykes IAS Deputy Commissioner, ban ïakren bad ban kyrpad ïa u ba un shimkhia lem na ka ban pynsngew ha ki bor ka aiñ ba ki dei ban pynshitom da kaba tyngeh ïa utei u runar.
U bah M.Dkhar sordar ka shnong Tiehsaw haba ïakren bad ki lad pathai khubor hadien ba ki la mih na ka kamra treikam jong u Deputy Commissioner, u la ong ba na ka liang jong u DC ha ryngkat ka jingdonlang jong u bah Bikram Marak Superintendent of Police West Khasi Hills, ki la kular ban shimkhia bad ki la ong ruh ba katkum ki dak ki shin bad ki sabut kiba la lap na katei ka jaka ba katei ka longkmie ka la shah pynïap, utei u riew bymman un ïoh ïa ka jingpynsajia kaba biang kat kum ka aiñ bad ki la ai ruh ka jingkyrmen ba ka Ïingbishar ba don burom kan bishar hok bad kan ai ka jingpyshitom katkum ka kam ba u la leh.
Kum ban pynkynmaw ba ha ka janmiet jong ka ar tarik mynta u bnai, u Biangkupar Nongsiej u lok barim jong ka (L) kong Wansaralin Wanñiang u la wan sha ïing ha ka por 6.30 janmiet katba katei ka longkmie ka dang don marwei ha kaba u la rah ruh da ka wait bad u la rung jubor hapoh ïing. Mar shu ïoh rung hapoh ïing u la kynrup bad pom ïa katei ka kurim jong u da katei ka wait na ki bynta ka khlieh haduh ba kan da khlad noh hashen.
