Shillong, Rymphang, 7: Da ka jingthmu ban pynitynnat ïa ka sor bad ban pynneh pynsah ïa ka mei mariang, u Myntri Rangbah ka Jylla u Conrad K. Sangma ha ka sngi Balang u la buh ïa u mawnongrim na ka bynta ban pyntreikam ïa ka Riverfront Development Project ha shi lynter ka Wah Umkhrah kaba tuid na dohnud ka Sor Shillong.
Lyngba kane ka jingsdang, la mang pisa T. 39 klur ban shna pynitynnat ïa ka rud wah jong ka Wah Umkhrah khnang ban pynduna ïa ka jingjaboh jong ka wah kaba la pynswai haduh katta katta ïa ka Wah Umkhrah.
Ha ka jingbuh ïa u mawnongrim ha ka jingïalang kaba la long ha Polo la sakhi lang da u Symbud Myntri Rangbah ka Jylla uba khmih ïa ka tnat Pynroi Sor u Bah Sniawbhalang Dhar, u Myntri Sorkar Bah AL Hek, ka Deputy Commisioner jong ka East Khasi Hills ka Kong RM Kurbah bad kiwei kiwei.
Ha kane ka sngi, u Myntri Rangbah bad u Symbud Myntri Rangbah ki la aiti ïa ka Cheque ba T.75 hajar bad T.1.50 lak lyngba ka My City Campaign sha ki Dorbar Shnong bapher bapher.
“Ngi la tyrwa mynshuwa ban pynkhuid ïa ka Wahumkhrah bad Umshyrpi hynrei ka Sorkar India kam shym la mynjur ban mang pisa ïa ka projek hynrei la bthah ïa ngi ban bishar thymmai biang, kaba ngi dang leh mynta” ong u Myntri Rangbah haba kren ha kane ka sngi.
U Sangma u la ong ruh ba ka Sorkar Jylla ka la ïatreilang bad ka Ministry of Jal Shakti na ka bynta ban pynneh pynsah ïa ka jingkhuid jong ka Wah Umkhrah bad Umshyrpi.
“Nga kyrmen skhem ba katba kane ka project ka dang ïaid ngi ngin nang pynkhreh ïa ka projek ka ban kynthup ïa ka jingpynkhuid ïa ka Wah Umkhreh bad Umshyrpi kaba la donkam palat,” la ong u Sangma.
Ha kaba ïadei bad ka jingkhapngiah ka Sor Shillong u la ong ba ïa ki bynta bapher bapher la ithuh kum ki Multi Level Parking Lots bad ki Hawker Zone.
U la ong ba ka jaka ha Polo hapdeng ka Polo Towers bad ka Majestic Hotel ba khlem pyndonkam yn sa aiti sha ka tnat Pynroi Sor na ka tnat Forest ban shna kum ka jaka pynieng kali.
U la ong shuh shuh ba ka Sorkar ka la ithuh bun ki jaka hapoh ka nongbah, kynthup ruh ïa ka jaka kaba don markhap bad ka Secretariat ïa kaba yn sa shna kum ka jaka pynieng kali.
Halor ka jingkhapngiah ka Khyndai Lad bad Iewduh, na ka daw ka jingbym pyrkhing ïa ka jingïaid ki kali, u Myntri Rangbah u la ong, “ka Sorkar ka la bishar bniah ïa ki jaka ba khapngiah bad ka la wad ïa ki lad ki lynti ban weng ïa ka jingkhapngiah jong kine ki ar tylli ki iew ba kongsan da kaba buh ïa ki jaka ban pynieng la ka jong ïa ki Bos bad ki taksi.”
