Shillong, Rymphang, 7: Ka Voice of the People Party (VPP) ka la ai jingïaroh ïa u Lamphang jong ka Ingdorbar Thawaiñ ka Meghalaya bad ïa ka Sorkar MDA namarba khatduh khatwai ki la sngewthuh ba ka Meghalaya kam dei ka jylla kaba kren ïa ka ktien Hindi.
Ka jingmynjur jong ki ban buh ïa u nongpynkylla ktien (Translator) ha ka Ingdorbar Thawaiñ ha ka sngi ba u Lat un kren ka dei ka jingpynskhem ïa ka nongrim bad jingdawa jong ka VPP.
Lah ban pynkynmaw hangne ba ha ka sien shong Dorbar Mang Tyngka ha u snem 2023, u Shongknor bad ka Sorkar Jylla ki la shu ïada rapjot bad pynbor ïa ki paidbah jong ka jylla ban sngap ïa ka jingkren jong u Lat ha ka ktien kaba kim sngewthuh kaba ym dei ruh ka ktien ba la ithuh (official language) jong ka jylla.
Ka VPP ka ai khublei ïa ka jingshlur bad ka nongrim baskhem jong ki MLA ka seng halor kane ka kam bad ka ai ïa ka jingkyrkhu kyrdoh ïa ki ha ka jingpyrshang jong ki ban shakri ym tang ïa ki paidbah jong ki Constituency jong ki hynrei ïa ka jylla baroh kawei kynthup ïa ki Constituency jong kito kiba don ha ka Liang Synshar.
