Shillong Rymphang, 7: Ka Dorbar Mangtyngka jong ka Iing Dorbar Thawaiñ ka jylla mynta ka samoi kan kham phylla namar ha ka sien kaba nyngkong eh yn sakhi ba ki nongthawaiñ kin ïoh ban peit ïa ka jingkren lamphrang halor ka Mangtyngka ha ki tablet ba la buh khnang na bynta jong ki hapoh Iing Dorbar.
Kane ka long ka sienjam ba la shim da ka Assembly Secretariat hapoh ka jingïalam jong u Lamphang ka Iing Dorbar, Thomas A Sangma ban wanrah ïa ka rukom treikam kaban pynduna ïa ka jingpyndonkam ïa ki kot ki sla ha kane ka dorbar mangtyngka.
Katkum ka kyrwoh na ka Assembly Secretariat la ïathuh ruh ba u Myntri Rangbah ka Jylla Conrad K Sangma un wanrah ïa ka Mangtyngka 2024-25 da kaba pyndonkam noh da ki kor ki bor ka juk technology ne digital ha kane ka Dorbar Mangtyngka kaban sdang naduh ka 16tarik mynta u bnai.
Ïa ka jingkren lamphrang halor ka mangtyngka ne ka budget speech lah ban peit lyngba ka website jong ka National eVidhan Application : https://neva.gov.in/Home/NeVA bad ha ka website jong ka Meghalaya Legislative Assembly lyngba ka : https://megassembly.gov.in/.
Katkum ka kyrwoh, la ong ba na ka liang ki ophisar na ka IT Cell jong ka Meghalaya Legislative Assembly Secretariat hapoh ka jingpeit jong u Computer Programmer, Bah Dapborlang Marwein ha ka sngi Balang ki la ai jinghikai ïa u Myntri Rangbah ka jylla u Conrad K Sangma kumno ban pyndonkam ïa ka National eVidhan Application.
Na ka liang u Commissioner & Secretary ka Assembly Secretariat, Dr. Andrew Simons u la ong ba kane kadei ka sienjam kaba ïaid ryngkat bad ka jingthmu ban wanrah ïa ka jingkylla hapoh Iing Dorbar khlem da donkam shuh ban pyndonkam ïa ki kot ki sla.
Shuh shuh la ïathuh ba kum ka jingsdang, ïa ki kot ki sla kiba ïadei bad ka sngi shong Dorbar, ki jingkylli, ki Motion, ki Resolution bad kiwei kiwei yn pynmih duna bha bad ïa kine yn sa buh ha ka NeVA website bad ha ka website jong ka the Meghalaya Legislative Assembly.
Shuh shuh la pyntip ba ki nongthaw-aiñ ki lah ruh ban phah ïa ki jingkylli bad kiwei kiwei ki notis lyngba katei ka application namar kane ka App ka long kaba shngaiñ na bynta iwei pa iwei i nongthawaiñ jong ka Iing Dorbar Thawaiñ ka jylla.
