Mawkyrwat, Jymmang, 28: Ka Lai-ngut Chidus Football Team ka la long kawei na ki kynhun ba rah ïa ka nam lahduh ha ka lympung ïalehkai kynjatbol ba la tip kum ka Nonglang Super League Football Tournament 2022-’23 hadien ba ka la lah ban tam noh da 1 – 0 kol pyrshah ïa ka Rangkynsai FT ba la pynïaid ka Nonglang Sports Club hapoh madan Pyndenïewlyngdoh, South West Khasi Hills District, Mawkyrwat.
Ha kane ka lympung ïalehkai phainal, la sakhi ba ka long ka jingïalehkai kaba itynnad bha namar la ïohi ba ha ka jingïalehkai jong ka kyllastep ka Laingut Chidus FT bad ka Rangkynsai FT kim shym la don mano mano ba lah ban ïa pynkhih jar namar ka jingtbit jong ki ‘rangïalehkai.
Hynrei haba wan phai ha ka jingïalehkai jong ka kyllamiet hadien ka jingïakhun kaba tyngeh kumno re kumno ka la don ka jingbakla, ha kaba ka Laingut Chidus FT ka la ïoh ïa ka Penalty ba la shut da u Shem Shylla hynrei kumno re kumno ïa kane ka jingshut une u ‘rangïalehkai u la shu pynleh noh ei noh khlem da ïoh ban pynrung ïa ka bol hapoh jong ka kol. Katba ka jingïalehkai ruh ka la nangïaid shakhmat kine ki baroh ar kynhun ki la sdang ban ïakhun tyngeh khnang ban ïoh ka lad ban pynrung ïa ka bol hapoh ka kol hynrei dei tat ha ka minit kaba 84 u George Franky uba dei jong ka Laingut Chidus FT u la ïoh ban pynkhih ïa ka jar bad kaba dei ruh ka kol ba nyngkong eh ha kane ka lympung.
Namarkata, lyngba kane ka shi kol, ka Laingut Chidus FT ka la rah syndon ïa ka nam lahduh da kaba ka la jop pyrshah ïa ka Rangkynsai FT.
Ha kane ka sngi pynkut ïa ka Nonglang Super League Football Tournament 2022-’23 la sakhi da kiba bun ki samla jong ka shnong, jong ka dong ka thaiñ ha kaba u kongsan ha kane ka sngi u dei u bah Edilbert Iawphniaw uwei na ki samla rangbah jong ka dong ka thaiñ Mawkyrwat.
