Tang ka jingtrei shitom kaban pynpoi sha ka thong

0

K a jingim jong u briew, ka dap tang da ki jingtynjuh ha baroh ki liang, ki dung kura na kamon na kadiang ïa ka jingshah rem kaba suk kloi ha ka jingim, pynban ha u ba shlur ka mynsiem, u thom lut ïa ki jingeh, u ieh shadien ïa ki, u pdiang bad ïai shah ïa kita ki jingeh kiba wan hakhmat ha ka jingim ka jong u, u ïakhun suki pa suki tad haduh ba un da kylla long u nongjop ha ka jingim.
Nalor kata ka jingim ha u briew ym lah ban khlem da ïaid lait na ka jingeh, ym don lad ne lynti ban ïa u ban ong ba un kam sha ki kliar lum ka nam khlem da hap ban mad ne ban ïaid ïa ki lynti kiba eh ha ka jingim, donkam ban mad ïa ki har rukom ki jingtynjuh, da kumta, shisien pat ka sngi ka lad ka lynti kan plie ïa ka jingim ka jong u ban kylla long kum u nongprat lynti ne uwei na ki khlur ba thaba halor jong ka sahit bneng.
Kumta, ki khun samla jong ka jylla, ki hap ban shim bad ban mad shwa ïa ka jingim kaba eh ha ka rta kaba dang khie dang san ka jong ki, kin hap ban kam suki pa suki ïa uwei pa uwei na ki mawmer ha ka jingim ka jong ki, yn nym don mano mano ba kloi ban kner ïa ki kti, namar ha kata ka lynti ban kynjoh sha ka thong kaba ïa thmu bad angnud, baroh baroh ki ïa mareh sted ban lah ban kynjoh kham kloi sha ka, kiba jaituh ba jaidpeh, kiba shu ap thap na kiwei, kiba shu tynneng ne pyrthuh, ha kaba sdang kine ki khaweh shalor ïa ka lama ka jong ki, hynrei katba ki nang jam pat sha khmat, ki shem bad ki mad tang ïa ki jingeh, kaba kim lah ban ïai shah ïa ki da kumne ka pynlong pat ïa ki ban sahkut sah hajuh khlem da kynjoh sha ka thong ba ki kwah ban poi.
Ki samla kin hap ruh ban pynmlien naka bynta ban pynjanai ïa la ka jingim naduh kaba sdang, kaba man la ki kam ba ki thmu ha ka jingim, ki donkam ban bud ïa ki mati ne ki nuksa na ki nongïalam kiba ha shwa ki jong ki, lehse ka jingbuddien ïa ki mati ki lah ban long kiba kyllaiñ ne kiba kham jwat, hynrei ki samla, kim dei ban kdat na ka, pynban pyrshang ban buddien ïa ki, namar ha kaba kut ki nongmuna ba la buddien ryntih ïa ki naduh kaba sdang, ki pynsuk ïa ka lynti ïaid ban kynjoh sha ka thong.
Haba kren halor kane, kum ki samla, ki hap ruh ban khmih bniah ïa ki nuksa jong kiwei pat ki para samla kiba minot bad trei shitom ha ka jingim ka jong ki, namar ha ka jingim ym don mano mano ba khang lad ïa u briew ban pyrshang ha ka jingim, to ai ba ka jingpyrshang ka sahkut ne kam tyllun beit shakhmat kumba la thmu, hynrei ka mynsiem ba ïai pyrshang bad ba kut jingmut, ki long ki mawjam ban kynjoh sha ka thong kumba la thmu ne angnnud ha ka jingim. Pynban ha kane ka juk ioh suk kaba mynta, kiba bun na ki khun samla, ki kwah beit ban kdat da ka lynti ban shu jam shakhmat da kaba suk, ki tieng ban ïaid na ki lynti ba khohruh khohram ha ka jingim, ki sngewtieng ki sngew smiej, ki kloi ban kbei briew haba I shah ba rit eh I thar ha ki sla kjat ki jong ki, ki kloi eh ban im ka jingim sarong bad ba sngew nang bad tip lut, pynban ki klet pat ha ka jingim ïa ka thong ba ki la buh hakhmat.
Balei ba ki khun samla kim don ka mynsiem ïakhun ha ka jingim, ïano ngin ïa kynnoh, hato dei na ka nongrim saiñ dur ïa ki ha ka liang ka pule ka puthi, ka jingbym biang ka tien sneng ka tien kraw nala rympei ïing, hato ym don ba kdew ne ban pyni ïa ka lynti ïa ki ban jam shakhmat ha ka jingim, ne don ruh kiba kloi than eh ban shu put turoi ïa ki kam bar it eh hynrei ba la shu pynkhraw bad rah nam jubor palat ha kaba sdang eh ka jingim ka jong ki.
Katno ngut shuh ki khun samla ka jylla, kiba dang dei ban tyngshaiñ ne ban paw bha ha ka jingim ka jong ki, pynban ka ka mynsiem sarong, hangamei, ba sngew ba nang bad ba tip lut, ne ba shu jam da ka lynti kaba suk, ba kim shan slem ban kyllon noh tang shi khyllip mat ha ka jingim.
Lada jin ba ki samla ba dang khie dang san, kin da shong shwa khop ban pyrkhat bad puson bha ha la ka jong ka jingim kaba la sdang ban tyngshaiñ, lehse kin nym khyllem kloi ha ka jingim, pynban kaba kut ïa ki ka long ba ki shu kylla long lem tang kum ki riew madan, bym poi shano shano ha ka jingim.
Kumta, ki khun samla, haba ki thrang bad angnud ban leh ïa kano kano ka kam ba kynsai bad ba nylla ha ka jingim, kin hap shisha ban don ïa ka mynsiem kaba sngew rit, kiba pdiang bad kohnguh ïa ki kyntien kiba la rangbah, kim lah ban saitlah ïa ka kyntien ka jong ki, namar u khynnah ha kaba kut un ïai sah u khynnah, hynrei u rangbah pat u long u nongprat lynti u ban kdew lem ïa kata ka lynti ban ïa kynjoh sha ka thong ka jingjop, kampher lada dei ha ka liang ka pule ka puthi, ka kam ïalehkai ne ban seng kam seng jam la jong, ki samla, donkam ban mad shwa ïa ka jingeh, ieh shadien ïa kata ka rhah kwah suk ne ïoh nong kaba kloi, pynban man ka sekon, ka minit bad ka kynta, man ka naïa, ka shi suka ka shi piah ka shi tyngka, kidei ban ïoh ban shong seng naduh kaba skhem ha ka jingim, namar ba kine kidei ki rishot bah kiba khlaiñ kiba lah ban kyrshan ïa ka jingim ba don hapdeng ka jingïakhun ïa ka thma ban long kiba shemphang, shem buit shembor bad ban sah nam sah kyrteng junom la junom.

Leave A Reply

Your email address will not be published.