Rah ka kynhun Lynti Jam Football Center kum ki ‘Meghalaya Masters’ haka Sunfeast Cup 2023

Nongpoh, Naiwieng 01: Hadien ka jingïaid shaphrang jong ka lympung ïalehkai phutbol Sunfeast Cup 2023 haka jylla, ka Lynti Jam Football Centre haka jingïatreilang bad ka SPT Sports Bangalore, mynta ka sngi kala pynhap pyrda noh ïa katei ka lympung hadien ka jingïakhun phainal bala pynlong ha madan ïalehkai ka shnong Mawleiñ Mawkhan ha Ri-Bhoi District.
Ha katei ka lympung ka kynhun jong ka Lynti Jam Football Center kala long ka lahduh ha baroh ki kyrdan ïakhun naduh ka U-13 ki shynrang bad U-16 ki kynthei bad shynrang ki ban sa leit mihkhmat pat ïaka jylla kum ki Meghalaya Masters sha ka NorthEast Sunfeast Cup 2023 ka ban sa long shen ha nongbah Guwahati naka bynta ban aireng pat bad kiwei kiwei ki kynhun naki jylla bapher bapher jong ka thaiñ Shatei Lam Mihngi.
Kum ban shu kdew hangne ka kynhun Lynti Jam Football Center haka jingïatreilang bad ka SPT Sports Bangalore kala pynlong kum katei ka lympung man u snem naka bynta ban kyntiew ïa ka kam ïalehkai phutbol bad ban sei madan ïaka sap ka phong ki samla bad khynnah ba don sap ha kaba 50 tylli ki kynhun na kylleng ka jylla kila wan ban ïa shim bynta shitrhem kynthei bad shynrang bala phiah haka kyrdan U-13 naka bynta ki shynrang bad U-16 naka bynta ki kynthei bad shynrang.
Ïa katei ka Sunfeast Cup 2023 la wan ban pynhap pyrda noh da u Dr. Ricky AJ Syngkon kum u kongsan haka jingïadonlang u Dr. David Lyngdoh, Sumarlang Swer President Lynti Jam Football Center, Samla Jester Mawlong President RBYF Mawleiñ Mawkhan, Samla Pynsngaiñlang Kurbah Vice President Mawleiñ Youth Sports Club, Bah T Makri Rangbah Shnong Mawleiñ bad kiwei kiwei.
Haba phai sha ka jingïakhun phainal jong ki U-13 boys ka Lynti Jam ka la lah ban pynliem noh ïaka Mawïong rim da 2 kol la 0, ha ka Under 16 Girls ka “Play For Right” PFR ka la shah liem noh haka Lyntijam Football Center da 1-0 kol bad haka jingïalehkai jong ki khynnah shynrang Under-16 ka Lyntijam Football Centre ka la pynliem noh ïaka Umsning lyngba ka tie-break. Kum ka jing pynshlur bad ai mynsiem ïaki samla ïalehkai, naka liang ka Lynti Jam Football Center bad ka SPT Sports Bangalore kila sam ruh ïaki khunsam sha ki kynhun lahduh bad kumjuh ruh kiba rem.