Pyrshah ka FKJGP Baridua Circle ba thmu pyndait smart meter ha ki ïing jong ka thaiñ Baridua

Nongpoh, Jylliew 19: Ka Federation of Khasi Jaintia and Garo People (FKJGP) Baridua Circle ka la pynpaw ïa ka jingpyrshah kaba jur halor ka jingthmu jong ka Meghalaya Power Distribution Corporation Limited (MePDCL) ban pyndait ïa ki Smart Meter ha ki katto katne ki longïing kiba don ha shnong Baridua, Ri-Bhoi District.
Halor kane ka bynta, ki nongïalam ka FKJGP Baridua Circle ki la leit ban ïakynduh ïa u Executive Engineer (EE) jong ka MePDCL ha Byrnihat ban pynpaw ïa ka jingsngewkhia bad jingpyrshah jong ka seng halor ka jingwan pyndait ïa kine ki Smart Meter ha katei ka thaiñ.
Haba kren sha ki lad pathai khubor, u Samla Denis Nongrum kum u President u la ong ba ka seng ka la shim ïa kane ka sienjam hadien ba bun ki paidbah nongshong shnong ki la wan ban ujor sha ka seng bad ki la pynpaw ïa ka jingsngewkhia halor ka jingkiew kynsan jong ka bai bording hadien ba la pyndait ïa ki Smart Meter, kaba la long kaba kham bun shah haba nujor bad ka bai bording kaba ki ju siew da ki meter barim.
U la ong ruh ba katkum ka jingsngew jong ka seng bad ki paidbah, ym pat donkam ban pyndait Smart Meter ha ki longïing jong ka thaiñ Baridua namar ki meter barim ki dang lah ban treikam bha.
“Ngi la pynpaw shai sha ka tnat MePDCL ba ka FKJGP Baridua Circle ka pyrshah jur ïa ka jingpyndait Smart Meter ha kane ka thaiñ. Ka nongrim jong ngi ka long ba ym pat don kano kano ka jingdonkam kyrkieh ban bujli noh ïa ki meter barim kiba dang treikam bha haduh mynta,” ong u Samla Denis Nongrum.
Ka seng ka la kyntu ruh ïa ka MePDCL ba kan sngap ïa ka sur jong ki paidbah bad ban bishar bniah biang ïa kane ka jingthmu khnang ba kan ym wanrah jingeh ne jingïakynad hapdeng ka tnat bad ki nongshong shnong.