Shillong Jylliew 19: Kumba 48 tylli ki Law Kyntang ki don hapoh ka jingpeit jingsumar jong ka KHADC, na kine, ha East Khasi Hills District ki don kumba 32 tylli ki Law Kyntang, ha West Khasi Hills ki don 13 tylli bad ha Ri Bhoi ki don tang 3 tylli, ïathuh u Executive Member ka KHADC u Bah Seiborlang Warbah uba khmih ïa ka Tnat Forest haba jubab ïa ka jingkylli ba la wanrah da u MDC ka Sohïong u Bah S L Thabah, ha ki kynta jingkylli ha ka sngi kut noh ka dorbar lyiur ka KHADC ha ka sngi Thohdieng.
Shuh shuh u EM u la ïathuh ruh ba ym pat don ne buh ïa ki lad jingïarap na ka bynta ban sumar ïa kine ki Law Kyntang, hynrei u la pyntip pat ba ka tnat ka dang pynkhreh ban pynkylla ïa ka United Khasi Jaiñtia Management and Control of Forest Act 1958 ban thung ka committee ban pynbha ïa ka aiñ khnang ban wanrah khajna ïa ka council.
U EM u la ïathuh ba ka Section 4, Sub B ka ïakren ia ki Law Kyntang kiba dei hapoh ka jingkhmih jong ki Lyngdoh bad ki nongsynshar shnong bad Hima.
Haba ïadei pat bad ka jingdonkam ban phah register ne pynrung kyrteng ïa ki Law Kyntang, u EM u la ïathuh ba ha ka 17 tarik u Nohprah 2015 ka la don ka shithi ba la phah sha ki nongsynshar shnong bad Hima hynrei ym don record ba la don kiba wan register ïa ki Law Kyntang khnang ba ka KHADC kan ïoh buh jingkheiñ bad ki jingthoh.
