Williamnagar, Nailur, 18: Ka Council jong ki Nokma, East Garo Hills Unit ka la pynpaw ïa ka jingpyrshah halor ka jingpynbna jong u Myntri Rangbah ka Jylla u Conrad K. Sangma ha ka sngi Saitjaiñ ha Williamnagar Nokma council Hall ba ka CrPC bad ka CPC kin treikam hapoh ki Schedule Area.
“U Myntri Rangbah u la ong ba ka CrPC bad ka CPC kin treikam ha ki Kashari jong ka Jylla Meghalaya baroh kawei ha kaba yn ym pyllait satia wat ïa ki Kashari jong ki District Council, ki Kashari jong ki Lasker bad ïa ki Kashari jong ki Nokma,” la ong ka Council jong ki Nokma.
“U la ong ruh ba kane ka jingpyntreikam ïa ka CrPC bad ïa ka CPC kan ym ktah satia ïa ki Kashari jong ki District Council bad ïa ki Kashari Hima. Hynrei u ïai ban ruh da kaba ong ba ka iktiar jong ki Kashari kiba hap hapoh ka Scheduled Area, kata, ki Kashari District Council bad ki Kashari jong ki Hima ki dei ban don ruh ïa ki Magistrate. Nga kyrmen ba u la kren shai ba ka jingmut jong ka kyntien “Magistrates” kiba don ïa ka iktiar ban pyntreikam ïa ka CrPC bad ïa ka CPC. Hynrei kam dei ban don pat ar jingmut ba ka CrPC bad ka CPC ïa kaba la pynlong aiñ da ka Parliament bad ka bym pat pyntreikam satia bad yn ym lah satia ban pyntreikam ha ki Shedule Area,” ong ka Council jong ki Nokma.
“Ngi, ki Garo ngi pyntreikam ïa ki aiñ katkum ka riti ka dustur ha ki Kashari Hima, ki Kashari Lasker bad ki Kashari jong ki District Council naduh ka juk ki longshwa ban tian bishar ïa kino kino ki jingujor. Ngi, ki Garo ngi don la ka jong ka jingbishar ba kyrpang ha kaba ki Kur ki don ïa ka iktiar ban bishar haba don kano kano ka jingïakajia hapdeng ki Kur bad ki longing longsem da kaba pynshong nongrim katkum ka riti ka dustur. Ki Sardar, ki Nokma, ki Lasker ki ju shong bisar ïa kino kino jingujor hapoh ka jylli treikam jong ki lane kino kino ki jingjia kiba hap hapoh ka jingpeit jingkhmih jong u pud u sam jong ki,” la ong shuh shuh ka Council jong ki Nokma bad bynrap, “kane ka la pynmyntoi shikatdei ïa ki Kur, ki longing longsem bad ïa ki shnong ki thaw ki bym donkam satia ban pynlut pisa khamtam kito kiba duk ba kyrduh bad ki bym kotbor ban leit ujor sha ki Kashari Sorkar lane sha ki Pulit. Kaba kham kongsan shuh shuh ka long ba ki nongshong shnong kim da kham don jingtip ban leit sha ki Thanat bad ban thoh ïa ki jingujor kaba long shabar jong ka riti ka dustur jong ki Garo.
“Kine kin buh jingeh bad kin pyndkut bad kin buh jingma ïa ka Sixth Schedule bad ïa ka imlang ka sahlang bad ïa ka hok jong ngi. Ngi ngeit ba ki nongshong shnong baduk ki kham noh mynsiem sha ka jingbishar katkum ka riti ka dustur kiba ju leh hapoh ki shnong ki thaw da ki Sardar, ki Nokma bad ki Lasker,” la ong kane ka kynhun ki Nokma.
“Ngin ym don kano kano ka jingpyrshah lada u Myntri Rangbah lane ka Sorkar Jylla ki kwah ban pynbha ïa kano kano ka rukom trekkam katkum ka jingïaid jong ka por ha kaba yn hap ban bud ryngkhi da ki Kashari jong ki District Council bad ki Kashari Hima lada ka Sorkar ka kwah ban pynduh noh ïa ka jingleh shiliang kaba ju jia ha ki Kashari jong ki District Council,” la ong shuh shuh kane ka Kynhun ki Nokma.
“Lada u Myntri Rangbah lane ka Sorkar ki kwah ban kham pynbna ïa kino kino ki aiñ ba la pyntreikam ha ki Kashari jong ki District Council bad ki Kashari Hima, nyngkong eh u dei ban leit sah da lade ha ki shnong ba sahdien tam khnang ban tip bad sngewthuh ïa ki riti ki dustur bad ban ïasyllok bad ki nongshong shnong, ki Sardar, ki Nokma bad ki Lasker hynrei ym ban ïasyllok bad ki MDC kiba ju wanrah ïa ka jingleh shiliang kat haba don,” la ai jingmut kane ka kynhun ki Nokma ïa u Myntri Rangbah.
