Ka Meghalaya ka wan ha ka kyrdan ba phra ha ka jingdon kiba ioh ïa u khniang HIV, kyntu ïa ki samla ban leit test
Williamnagar, Naitung 11: Ka jylla Meghalaya ka wan ha ka kyrdan kaba phra ha ka ri ha ka jingdon jong u khniang jingpang HIV, ha kaba bun ki briew kim tip ïa ka jingdon HIV jong ki, la ong ki heh ka koit ka khiah ha ka sngi saitjaiñ haba kyntu ïa ki samla ba kin leh test man ka por bad ban kiar na ki jingleh kiba buh jingma.
Katei ka jingmaham ka la wan ha ka Red Ribbon Youth Festival 2026, kaba la pynlong da ka Loyola College, Williamnagar, ha ryngkat ka jingiatreilang bad ka Red Ribbon Club bad ka Meghalaya AIDS Control Society (MACS), ban kyntiew ïa ka jingpynsngewthuh shaphang u HIV, ka jingim kaba koit ba khiah bad ka jinglong ba kitkhlieh hapdeng ki khun samla.
Haba ai jingkren ha kane ka prokram, ka kong Larina Nongpiur, Assistant Director (Youth), ka MACS ka la ong ba ka jingpang HIV kam don shuh tang ha ki shi jaka hynrei ka la long ka jingshisha ha kylleng ki jaidbynriew ha Meghalaya.
“Kaba kham sngew shyrkhei shuh shuh ka long ba bun ki briew kim tip ïa ka jingdon HIV jong ki.Ka jingbun jong kiba leh ïa ka test HIV ki dei ki longkmie kiba armet”, ka la ong da kaba kyntu ïa ki samla ba kin leh ïa ka test.
Ka District Medical and Health Officer (DHMO) ka Dr Cruzie Elmina N. Sangma ka la ong ba ka jylla Meghalaya kam dei tang ba ka don ha ka kyrdan kaba phra ha ka jingbun ki ba ioh ïa u khniang jingpang HIV hynrei ka dei ruh kawei na ki jingpang ba saphriang na ka sexually transmitted infections (STIs), ha kaba ka jingshongkha khleh ka dang sah kum ka lad ba hakhmat eh ban saphriang ïa ki khniang jingpang.
Ka la maham ruh ïa ki samla pule pyrshah ïa ki rukom dro tattoo bym shngaiñ, da kaba ong ba katto katne ki jingpang ba la pyntip ha Williamnagar ki don jingïadei bad ka jingpyndonkam ïa ki thyrnia ba khlem pynkhuid.
Ka la kyntu ïa ki briew kiba don ïa ka jingpang HIV ban wad jingsumar khlem da pynslem bad ka la pynshlur ïa ki longïing ban jied ïa ki jingkha khun ha ki jaka sumar, ha kaba ka jingpeit bniah ïa u HIV man ka por ka long shi bynta jong ka jingsumar pang jong ki longkmie.
U Superintendent of Police (SP) u Pawar Swapnil Vasantrao uba dei u kongsan u la pynshlur ïa ki samla pule ban im ka jingim kaba don akor, da kaba shim na ki jinghikai ba ju pynshong nongrim ha u Chanakya.U la kyntu ïa ki ban ïai pynleit jingmut, ban trei shitom bad ban jied da ka jingkitkhlieh.