Khlem pat phah ktien ka sorkar sha ka HPC halor ka jingpynkynriah ïa ki Harijan

22 tarik yn shong jingïalang ka HLC

0

Shillong, Nailur 18: Hadien ba ka sorkar jylla ka la ïoh pdiang ïa ka Blue Print ba thymmai na ka tnat Urban Affair ïa ka jingpynkynriah ïa ki Harijan ba shong ba sah ha Them Ïewmawlong ban pynkynriah noh sha ka jaka ba ju don ka Municipal Office ha ka 16 tarik haba shong bishar ïa ka case ba la ujor da ka Harijan Panchayat Committee, ki Muktiar ka sorkar ki la pyntip ba na ka liang ka sorkar ka la pyntip kan sa shong jingïalang ha ka 22 tarik ban ïatai halor kane ka mat ha ka High Level Committee.
Haba u Mawphor u pyrshng ban bud dien ïa kane bad ïakren bad Gurujit Singh u Secretary ka HPC u la ïathuh ba na ka liang ka HPC kam pat ïoh satia kino kino ki kot ki sla haduh mynta ruh halor kane bad kim pat ïohi ruh ïa ka Blue Print kaba ka Urban Affair ka la aiti sha ka sorkar.
“Kumba long mynta kaei kaba ngi tip ïa kane ka jingtyrwa ruh ka dei beit tang lyngba ki lad pathai khubor bad lyngba ka jingai jingtip ki muktiar ha ka Ïing Bishar hynrei ban ïakren bad ka sorkar kam pat don satia” u la ong.
“kat kum ka jingpyntip ki Muktiar ka sorkar ki shu ïathuh ba ka HLC kan shong jingïalang ha ka 22 tarik hynrei ban shong ïatai hapdeng ka sorkar bad ngi kam pat don haduh mynta ruh” u la bynrap.
“Ngim pat lah ban shong jingïalang na ka liang jong ngi ban shimn rai ïa kane la ngin pdiang ne wad da kawei pat ka lad” u la bynrap shuh shuh.
Ha ka hukum ba shipor(interim order) ka Ïing Bishar ka la ong “Kane ka mat ka shuh sah pongding la katto katne por. Kiwei ki jaka ban pynkynriah la dep wad ban ithuh(identified) bad kyrmen ba na ki arliang mamla kin lah ban poi lang ha ka juh ka thong ïa kane ka mat ha kine ki khyndiat por ban wan”.
Shuh shuh na ka liang ka Ïing Bishar ka la rai ban shong bishar biang ïa kane ka kam ha ka 21 tarik Risaw.
Kumban shu kdew na ka liang ka sorkar kham mynshuwa ka la rai ban pynkynriah sha Mawbah sha ka jaka ba don ka TB Hospital hynrei na ka liang ki nongshong shnong bad ka Dorbar Shnong bad ki seng bhalang ki la pynpaw jingfpyrshah bad kumjuh na ka liang jong ka HPC kam sngew mon ban kynriah sha kane ka jaka na mar ka kwah beit ba ka sorkar kan pynkynriah sha ka jaka orkar ne Revenue Land.
Lah ruh ban kdew hangne ba ka sorkar ka la rai mynta ban pynkynriah sha ka Office Municipal bad kane dei ka jaka ka hap hapoh Revenue Land bad ka dei ruh ka European Ward.

Leave A Reply

Your email address will not be published.