Ym thikna ïoh bai bam nongtymmen bym pyllait pisa ka Social Welfare

Shillong, Nailur 18 : Ka kaiphod Comptroller and Auditor General (CAG) of India ka lap ba ki don bun ki jingduna ha kaba pyntreikam ïa ka Chief Minister’s Social Assistance Scheme (CMSAS) bad kawei na kita kaba kongsan tam ka dei ka jingbym thikna ban ïoh bai bam nongtymmen kiba dei ban ïoh namar ka jingbym pyllait pisa na ka tnad Social Welfare bad ki CDPO.
Ka rukom siew pisa sha ki nongïoh jingmyntoi ruh ka long da ki bearer cheque ka bym biang satia namar ym thikna ban poi ka pisa sha kiba dei hok ban ïoh ruh.
Ka CAG ka la lap ba ki don ki jingduna kiba khraw namar ym don jingbuh jingkheiñ bad buh ryntih ïa ki kyrteng jong ki nongïoh ruh na kata ka daw don ki khep ba ka tnad ka siew arshah sha kiba ïoh jingmyntoi wat na kiwei kiwei ki skhim ruh bad don pat ki bym ïoh ïa ka pisa ruh.
Kumta haba shim kyllum baroh ka kaiphod CAG ka lap hi ba ka jingpyntreikam kam biang satia bun tang ki jinduna namar ym shym la pyntreikam ïa ka skhim kat kum ka DBT Mode. Namar ban da pyntreikam da ka DBT kan ïarap ban pynbeit ïa kine ki kynrum kynram baroh bad ka rukom siew ïa kiba ïoh jingmyntoi kan long kaba beit bad kaba khuid bad suba bha.
Haba bishar bniah na ki CDPO ka kaiphod ka pynpaw ba naduh u Iaiong 2017 haduh u Naitung 2020, ka pisa ba la pyllait ka long 68.01 lak na ka bynta ban siew bai bam nongtymmen ne kiwei kiwei ki jingïarap sha ki 1041 ngut ki nongïoh ïa ka skhim CMSAS hynrei la lap pat ba ïa katei ka pisa ym shym la thep sha ki bank account jong ki nongïoh da kaba aidaw ba ym lah satia ban thep ha kitei ki account ba ki don jingthut.
Ka daw ba la ai ba ym lah ban thep ha kitei ki bank account ka dei ba ai bakla ïa ki bank account. Hynrei haba wad bniah pat la lap ba ym don jingbuh jingthoh ba ki CDPO ki pyrshang ban pynbeit ïa katei ka jingeh khamtam ba kin pyntip sha kito kiba dei hok ban ïoh ba kin ai da ki bank account kaba biang.
La lap ruh da ka CAG ba ym shym la thung ïa ki District Coordination ne Monitoring Committee ha baroh ki district. Kumta da ka jingbym thung ïa kine ki committee ban peit ïa kine ki jingeh jong ki nongïoh bai bam nongtymmen ka don ka jingkynrum kynram ha kaba siew ïaki bai bam nongtymmen. Kitei baroh 1041 ki khlem ïoh jingmyntoi ha kitei ki snem ba ki dei hok ban ïoh lap ka CAG.
Ki CDPO haba ki pdiang ïa kane ka jinglap ka CAG ki la pynpaw ba kin pyrshang katba lah ban pynbeit ïa kane ka jingeh khamtam ban pynbeit ïa kitei ki bank account jong ki nongïoh jingmyntoi na ka skhim.
Halor kitei ki District Coordination Committee bad Monitoring Committee i Director jongka tnad Social Welfare i la kular ban sa thung noh ïaki committee bad ban kynthup ïa baroh ki manager jongki bank ha ki district bad block kum ki dkhot khnang ba kin ïarap ban peit ïa kane ka jingeh.
Nalor kane la pynpaw ruh ba kito kiba don jingduna dkhot met kiba ïoh ia ka Unemployment Allowances ruh ki lah ban aplai ïa kane ka CMSAS skhim.
Haba ka CAG ka bishar ïa ki Database jong ki C & RD Block na ka bynta ka skhim IGNDPS kiba dei ban ïoh da kito kiba don jingduna dkhot met, la lap ba ha ki phra tylli ki CDPO jong ki Block ki don 15 ngut kiba ïoh jingmyntoi bad la siew sha ki 2.12 lak tynkga.
Na ka bynta ka skhim IGNEPS kaba dei ka skhim ban ïarap ïa ki longkmie kiba shah ieh ha u lok kat kum ka CMSAS ki don 8 tylli ki CDPO Block kiba pyntreikam ïa ka skhim bad ki don 41 ngut kiba ïoh jingmyntoi bad la siew sha ki 5.23 lak kata naduh u Iaiong 2017 haduh Naitung 2020.
Kumta ka CAG ka lap ba ka jingai ïa ka CMSAS sha ki 111 ngut nalor ba kila ïoh ïa ka skhim IGNWPS kiba long 41 ngut, ka skhim IGNDPS 15 ngut bad Unemployment Allowance 55 ngut ka la wanrah ka jingpynsyrwa kai ïa ka pisa haduh 22.91 lak tyngka.
Na ka liang i Director jongka Social Welfare ila pynpaw ba naduh u bnai Rymphang 2022 la bthah ïa ki CDPO ba kin bud pyrkhing ïa ki kyndon shwa ban siew pisa sha kiba ïoh jingmyntoi bad ki dei ban pynthikna ïaka list na ki C & RD Block.
La bthah ruh ba ia ka pisa ba la siew tam sha kito kiba la ïoh yn ïa kheiñ na ka pisa ba ki dang dei ban ioh.