Khliehriat Ïaïong 28: Ka Hynñiewtrep National Youth Front East Jaiñtia Zone (HNYF-EJZ) kaba hapoh ka jingïalam u President, u Bah S.Ryngkhlem bad u General Secretary, u Bah Jesper Swer mynta ka sngi ki la leit buh da ka jingthoh ha ophis u Deputy Commissioner ka Easr Jaiñtia Hills District ha Khliehriat ha kaba ka seng ka la pynpaw ïa ka jingpyrshah jur ïa ka public hearing jong ka company Shree Cement Ltd, kaba thmu ban khlong ïa u mawshun na kawei ka par kaba don hapoh elaka Nongkhlieh bad la buh ban pynlong ïa ka public hearing ha ka 22 tarik u bnai jymmang 2026 ha Lum Shyrman kaba hap hapoh elaka Nongkhlieh East Jaiñtia Hills District.
Katkum ka shithi ka HNYF East Jaiñtia Zone ka la pynpaw ba kane ka jingpyrshah jong ka seng ka long ruh kum ka jingai jingkyrshan lang ïa ki briew kiba na Shnongrim kiba ïeng pyrshah ïa kane ka public hearing, shuh shuh ka seng ka la pynpaw ruh ba lada ailad ban khlong ïa u mawshun na katei ka jaka na Lum Shyrman ka lah ban ktah ïa ka wah Liteiñ kaba don hajan bad ktah ruh ïa ki don um kiba don hapoh kane ka wah.
Ka seng ka dawa na u Deputy Commissioner bad kumjuh ruh na ka tnat Meghalaya State Pollution Control Board ba dei ban pynsangeh noh mardor ïa kane ka public hearing.
Kum ban shu bynrap na ka liang kiba bun ki nongshong shnong kiba dei ki trai jaka kiba na Shnongrim elaka Nongkhlieh, East Jaiñtia Hills District ruh ki la dep buh ruh da ka jingthoh hakhmat u Member Secretary MSPCB bad pynpaw ruh ka jingpyrshah jur ïa kane ka public hearing kaba la pynbna da ka tnat Meghalaya State Pollution Control Board kaba tmu ban pynlong ha ka 22 tarik u bnai jymmang 2026, kane ka public hearing ka dei halor ka jingthmu ka company M/s Shree Cement Pvt Ltd ban khlong ïa u mawshun na kawei ka jaka kaba heh 217.394 Hectar kaba khot ka Lum Syrman Limestone Block-A kaba long katkum ka ka public notice jong ka Memo: No MPCB/TB-360/2026/SCL (Block-A)/EJHD/2026-27/4-A, dated: 17th April 2026 ha kaba ka company ka thmu ruh ban buh ïa ka Primary Lumshyrman Limestome Crusher bad Secondary Crusher bad ki nongshong shnong ki la ong bad pynpaw ba ia kane baroh la leh khlem da ioh jingbit na ki kiba deihok ki trai jaka.
