Hadien ba ïoh ïa ka kaiphod Delimitation yn sa rai pynlong election ka sorkar ha GHADC

Shillong, Iaiong 28: Ka Sorkar Jylla ka dang ap ïa ka kaiphod jong ka Delimitation Committee kaba la thung da ka Garo Hills Autonomous District Council hashwa ba kan shim ïa ka rai ban pynlong ïa ka elekshon jong ka District Council, la ong u Symbud Myntri Rangbah ka Jylla u Bah Prestone Tynsong hynne ka sngi Baar.
“La thung ïa ka Delimitation Committee bad mynta ka dang trei ïa ka kam ban peit ïa kiei kiei baroh bad ban kheiñ bha kumno bad ban aiti ïa ka kaiphod sha ka District Council bad hadien kane ka District Council kan hap ban ïoh ïa ka jingmynjur na ka ïing Dorbar bad ban phah sha u Lat ka jylla na ka bynta ban ïoh ïa ka jingmynjur’” ong u Bah Tynsong haba ïakren bad ki nongthoh khubor.
“Kumba long mynta, na ka liang ka Sorkar Jylla ne u Lat ka Jylla ki dang ap ïa kata bad shisien ba la mynjur bad la phah sha u Lat, nga ngeit skhem ba ngin sa lah ban ai ïa ka jingmynjur” ula bynrap.
Haba kylli halor ka jingbuh ïa ka por, u Bah Tynsong ula ong “Katkum ka jingpynbna paitbah, nga tharai ka district council hi ka lah dep ban pynmih ïa ka jingpynbna bad kane ka Delimitation Committee kan pyndep ïa la ka kam kumba la bthah ïa ki hapoh ka por jong ka 3 bnai”.
Lyngba ka Delimitation yn phiah bad pynbeit ryntih ïa u pud u sam jong ki constituency hapoh jong ka GHADC.
Ula ïathuh, ba ka Council ka hap ban mynjur ïa ka kaiphod bad ban ïoh ïa ka jingmynjur na u Lat khnang ba yn lah pat ban pynïaid noh shakhmat ha ka ban pynlong ïa ka elekshon.