Shillong, Iaiong 28 : Ka ïing Bishar ha kane ka nongbah Shillong ka la pyllait jamin ïa ka Sonam Raghuvanshi ka kurim jong u Raja Raghuvanshi kaba dei ka nongshah kynnoh ba hakhmat eh halor ka jingdon kti jongka ban pyniap ïa la u jong u tnga ha Sohra na ka daw ba ka ïing bishar ka lap ba ym biang satia ki kyndon jingpyntip halor ka jingshah kem jongka.
Ha ka hukum ba la pynmih ha ka Lah Sngi U Blei ka 27 tarik Iaiong haba shong bishar ïa ka jingpan jamin jongka, ka ïing Bishar jongka Additional DC (Judicial) kong D.R Kharbteng ka ong kane ka jingduna bad bakla ki long kum ki jingpynkheiñ ïa ki lad jingïada jongka Riti Synshar ka ri India kat kum ka Article 22 (1) bad pynduh ïa ka hok ban ïada ïa kaba shah kynnoh.
Ka ïing Bishar ka la kdew ïa ki jingbakla ha ka por ba shah kem ha ki jingbuh jingthoh ha ki kot ki sla. ïa ka FIR la ujor ha Sohra PS Case No 7/2-25 la rejister case ha ki kyndon 103 (1)/238(a)/309(6) jongka BNS katba ha ka jingpyntip halor ka jingshah kem kumba la ai sha ka Sonam ka long ha ka kyndon 403(1) ha ka jaka ka kyndon 103 (1).
Haba bishar ia ka Annexure 8 ha ka jingthoh ba la ai sha kaba shah kynnoh ym shym la pruid dak ha ki ‘check boxes ban pynpaw kiei ki kyndon ba la pynngat ruh.
Wat ki kyndon jong ka aiñ kiba la kdew ha Sohra PS Case No 7/2025u/s 403(1)/238(a) 309(6)/3(6) BNS”.
Ka Nongbishar ka la kyntait ïa ka jingïasaid ba dei ka jingbakla type hadien ba ka la bishar bad lap ba kiba bun ki jingbakla ha kiwei kiwei ki kot ki sla ruh.
Baroh ki kot ki sla kiba ïadei bad ka Sonam Raghuvanshi naduh ka “check list” ban pynshong nongrim ïa ka jingkem, haduh kiwei kiwei ki bynta ruh ka kyndon kaba la kdew ka dei u/s 403(1). Kumta haba bishar la lap ba ym shym la pyntip thikna sha ka halor ka kyndon 103(1) BNS. Kumta ym shym la pyntip ïa ki jingshisha sha kane ka briew ba la shah kynnoh.
Ka ïing bishar ka la lap ba ym shym la pyntip thikna halor ki kyndon ba shah kem bad kane kam long kaba biang.
La lap ruh ba ym shym la buh jingthoh ban pyni ba kane ka nongshah kynnoh ka don ki Nongiasaid ai ha ka por ba tian bishar ia ka ha iing bishar ha Ghazipur.
Hadien ba la pynshong nongrim ïa ki hukum ba pynmih da ka ïing Bishar Supreme Court bad High Court jongka jylla la rai ban ai jamin noh ïa ka Sonam halor ki kyndon.
Ka Sonam ka la shong phatok 10 bnai lynter naduh ba ka shah kem ha ka 9 tarik Jylliew 2025 bad ka jingpyllait jamin ïa ka ka long ruh halor ka jingteh kyndon ban siew 50,000 tyngka ryngkat bad ki arngut ki nongsakhi jongka ki ban ïalong kajuh ka pisa.
La hukum ïa ka wat la ka lait jamin kam dei ban jah rngai ne pynduh pyndam ïa kino kino ki sakhi sabut. Ka dei ban wan mih sha ka ïing bishar man ba khot hajir ïa ka. Kam lah ban mih napoh u pud u sam ka ïing bishar lait noh tang lada ka ïoh jingbit bad ka dei ka jingteh kyndon ïa ka ba 50 hajar tyngka ryngkat bad ki arngut ki nongsakhi ki ban buh mar katjuh ka pisa kata 50 hajar tyngka hi.
