Pyntip u Myntri hapoh ïing dorbar ba ka Meghalaya ka la dep pynbna bun ki Law Kyntang kum ki law kyrpang

Shillong, Nailar 10 : U Myntri ka Development of North Eastern Region (DoNER) G Kishan Reddy ha ka sngi Palei ula pyntip ba ka Sorkar Meghalaya ka la dep ban pynbna ïa katto katne ki khlaw kyntang kum ki law kyrpang ne Community Reserve hapoh ka Wildlife (Protection) Act, 1972.
Ha ka jubab da ka jingthoh ha Rajya Sabha, u Reddy ula ong ba ki bor treikam kum ki Dorbar Shnong ha Meghalaya ki trei ïa ka bynta ba kongsan bha ha ka imlang sahlang bad ka ïoh ka kot ka Meghalaya, nalor ka jingïada ïa ka mei mariang bad pynsngewthuh ïa ki paidbah halor ki jingïada ïa ka mariang bad ki jingthaw kiba don ha ka.
Ka dustur kum ka jingpynneh ïa ki khlaw kyntang, ka jingkhang ban pynjot palat ïa ka sawdong sawkum kum ki khlaw, ka jingïada ïa ki shyngiar ne ki tyllong umdih bad kiwei ki tyllong um da ka jingstad, ki aiñ tynrai ba pyrrkhing ïa ka jingleit siat mrad, ki la ïarap bha ban ïada ïa ka mei mariang bad ki jingthaw ba im ha kane ka Jylla.
Ula ong ba ka skhim ka Sorkar Pdeng kum ka Integrated Development of Wilflife Habitats bad ka Compensatory Afforestation Fund Management bad Planning Authority (CAMPA) jong ka Sorkar ka la wanrah ïa ka roi ka par sha ki shnong ki thaw da kaba plie lynti ïa ki ban kamai jakpoh da kiwei ki jait kam.
Ki Shnong ki thaw bad ki Dorbar Shnong ha Meghalaya ki la ïadon bynta lang ha ki kam ban ïa plan, ban ai jingkyrshan ïa ki Village Employment Council. Ban ithuh ïa ki nongïoh jingmyntoi na ki prokram bapher bapher ka Sorkar, ban ai jaka na ka bynta ki project bad kiwei kiwei, na ka bynta ka roi ka par jong ki jaka riewlum ha ka Jylla.