Markhmat lap ka KHADC ba la julor lut ki ïing Hima ha Heritage Village shwa ka Monolith Festival

Shillong, Nailar 10 : Ka Khasi Hills Autonomous District Council hynne ka sngi ka la lap ba bun ki iing Hima kiba ieng hynñiew snem mynshwa ban pyni nam ha ka Monolith Festival kaba long ha Khasi Heritage Village ha Mawphlang ki la julor lut bad la donkam bn maramot lut ïa ki.
Ïa kane baroh la lap hi da ka Committee jong ka Council kaba peit ïa katei ka Monolith Festival ha ka jingleit jurip ïa katei ka heritage village ha kane ka sngi Palei ha ryngkat ka jingdonlang ki ophisar na ki tnad sorkar, na ka Hima Mawphlang bad khamtam eh ki Executive Member kynthup naduh u Bah Victor Ranee, Bah Rangkynsai Kharbuki, Bah Fantin J Lakadong, Bah Carnes Sohshang kumjuh u MDC ka thain ba dei ruh u Chairman ka Council, Bah Lamphrang Blah.
Na ka liang u EM ka tnad Arts and Culture, Bah Victor Ranee u la ïathuh ba kadei ka jingshisha ba kitei ki iing ba la tei da ki Hima ki la julor lut bad ki la donkam lut ban maramot ïa ki shwa ka Festival. “Hynrei ïa kaei kaba ngi lap mynta ngin hap ai pat ïa ka kaiphod sha u CEM,” u la ong haba kren bad ki lad pathai khubor.
Katba na ka liang u Bah Rankynsai u la ong ba ka jingpynlong ïa katei ka tamasa kam dei eh ban ïohnong ïa ka pla tyngka jong ka Council hynrei hakhmat eh kadei na bynta ban pyni sha ka pyrthei ïa ka jingriewspah ka riti dustur bad ka jinglong tynrai jong ka Jaidbynriew lyngba ki Hima bapher bapher.
U Bah Lamphrang Blah pat u la ong ba ki khmih lynti ba kane ka tamasa kaba ki buh ban pynlong la kumno kumno ha u Nohprah mynta u snem kan dei kaba kham heh bad kham phuh bha namar na ka liang u Myntri Rangbah ruh u la kular ban kyrshan lang ïa katei ka tamasa.