Shillong, Nailar 10: Haba kubur bad ka jingong u Myntri Rangbah ba ki Samla kidei ban shlur ne nud ban mih shakhmat ban don ka mynsiem ïakhun ne compete ha ka liang ka ïoh kam ïoh jam, u President ka HYC, u Bah Robertjune Kharjahrin, um ïahap pat bad ka jingong u Myntri Rangbah ba ki Samla trai ri trai muluk kin shu ap beit kmang na ka Reservation.
Lah ban kdew hangne ba u Myntri Rangbah, u Conrad Sangma haba kren ha ka jingrakhe ïa ka sngi jong ki trai ri trai muluk ha Shillong hynnin ka sngi, u la ong ba ki Samla trai ri trai muluk, kim dei ban ap beit kmang ban ïoh jingmyntoi ne ïoh kam ïoh jam tang na ka Reservation Policy, hynrei dei ban ïakhun ne ïa compete bad kiwei.
U Bah Robert, u la ong ba kane ka jingkren jong u Conrad Sangma ka pynpaw ba u dei uba kyrshan ban pynduh noh ïa ka Reservation ne ka jingbhah kam kyrpang ïa ki trai ri trai muluk. “Kane ka jingkren u Myntri Rangbah ka paw shai hi ba u kwah ban pynduh noh ïa ka Reservation”, la ong u President ka HYC.
Halor kane ka bynta, u Bah Robert u la ong ba lada u Conrad u kwah ban ïakhun ha Meghalaya dei ban don noh da ka Combine Reservation na ka bynta ki Khasi, Jaiñtia bad Garo, ym donkam shuh ban bhah la ka jong ka jong kumba bhah baroh shi katta.
Ha kajuh ka por u la pynpaw ka jingsngewlyngngoh ba ha ri India ha kine ki lai snem baladep, ka jingbhah kam kyrpang na ka bynta kiba duk, ka la nang kiew, katba ha Meghalaya pat ka jylla kaba wan ba ar ha ka jingduk tam ha ri India, u Myntri Rangbah u kwah ban pynduh noh ïa ka jingbhah kam kyrpang.
“Ka bym lah ban long kane te, haba nang duk ban pynduh noh ïa ka jingbhah kam kyrpang te nang duk shuh shuh hi keiñ”, u la ong.
