Jowai, Nailar 10: Ka Lehñiam Behdeiñkhlam ba shisien shisnem jong ka Seiñ Raij Ialong kala poi noh sha kaba kut mynta ka sngi Palei ha ka jingiphuh ipheing bala wan ban ïashim bynta da ki khun ka ka Sieñ Raij bad ki dong bapher bapher.
Ïa ki rot bala wanrah mynta ka sngi kila don haduh 10 tylli bad hadien ka jingshad ha ryngkat ka kmen ka risa ka put ka tem ïa ka tangmuri ka bom, la leit noh ïa ki rot ha ka jaka ba la khot ka Tre-Pyrda (Aitnar).
Haba phai sha ka jinglehñiam kala long kaba ïaid beit ïaid ryntih naduh kaba sdang bad haduh mynta ka sngi pynkut ha kaba lawan ban sakhi lang da Myntri Rangbah ka jylla u Conrad. K. Sangma haka sien ba nyngkong kum u kongsan, ha ka jingdonlang u symbud myntri rangbah ma Sniawbhalang Dhar, u MLA ka Jowai ma Wailadmiki Shylla, u ma Damanbait Lamare MLA ka Umroi, ka kong Santa Mary Shylla MLA, u Daloi ka Elaka Jowai ma Puramon Kynjing, ki Waheh Wasan bad kiwei de kiba la shah khot sngewbha.
Naka liang u Conrad K. Sangma haba ai jingkren ha kane ka sngi ula ai ki kyntien kyrkhu kyrdoh ïa ki nong pynïaid ka Seiñ Raij Ialong kiba la trei shitom ban pynïaid beit pynïaid ryntih ïa kane ka lehñiam Behdeiñkhlam bad u kyrmen skhem lyngba ka jingpyndep ïa kane ka lehñiam kan wanrah ïa ka bha ka miat, ka roi ka par ha baroh ki liang.
Ha ka juh ka por ula kular ban ïarap katkum ka Memorandum ba la aiti ha u da ka Seiñ Raij Ialong bad ka Dorbar shnong kata ban pynbha pynmiat ïa u surok naduh main road shaduh ka jaka jngohkai ka Ialong Park. Ha kaba ïadei bad ki jaka peit kai (Gallery) ka Tre-Pyrda (Aitnar) na ka liang u myntri rangbah ula kular ban ïarap ïa kane ka jingdawa.
Ïa ka jingïalang ha kane ka sngi la pynïaid da u President ka SRI ma P. Shylla, la ïathuh ruh ba ki dong bapher bapher ba kynthup na ka Seiñ Raij na Wahiajer, Ïalong bad na Nongkhyllem kila wan ban ïashim bynta ha kane ka lehñiam Behdeiñkhlam.
