Shillong, Nailar 10: Ka Kynhun ne ka Seng kaba la pynïatylli ïa ki niam bapher bapher ha Shillong, ka Shillong All Faiths Forum (SAFF) mynta ka sngi ka la rakhe ïa ka jingdap lai snem jong ka da kaba pynlong ïa ka jingïalang ha Banchi Hall, Laitumkhrah.
Ha kane ka jingïalang rakhe u Lat ka jylla, u Phagu Chauhan u la ong u Kongsan bad la ïadon lang ki nongïalam kane ka kynhun bad kumjuh ruh ki nongïalam niam kiba kynthuo ïa u Bishop P. Lyngdoh, u Phadar Richard Majaw, u Archbishop Victor Lyngdoh, u Naba Bhattacaharjee, u Dr. Omarlin Kyndiah bad kiwwei de.
Kiba la ïashim bynta ban ai jingkren ha kane ka jingrakhe ki la pynpaw ba kumno ka jingïalum lang jong ki lai snem mynshuwa ka la wanrah ka jingïatreilang kaba jan hapdeng ki kynhun niam bapher bapher ha Shillong, khamtam eh ha ka por jong ka khlam COVID 19, ha kaba ka jylla bad ka pyrthei hi baroh kawei ka la shah lynshop ha kane ka khlam.
Kiwei ki la pynpaw ruh ba ha kaba kum kane ka por ba ki jingsniew bad ka jingmih ki kynhun shit niam, ka jingïakynad sngewpher niam, ka jingmih ki kynhun ban pyniatylli bad wanrah ka jingïatreilang ki niam ka long kaba donkam haduh katta.
U President jong ka Forum, u Bishop P. Lyngdoh, u la ïathuh ba kumno ki nongïalam ka SAFF ki la mih skhmat ban ïarap ïa ka sorkar ha kaba pynsngewthuh ïa ki paidbah ha kaba pyntreikam ïa ki Standard Operating Procedures (SOP). Nangta ka la ïareilang ruh na ka bynta ban peit ïa kito kiba ngat ha ka jingeh haki arsnem ba wan lynshop kane ka jingpang khlam.
