Pyntip u Dy. CM ba la khot tender biang ban shna ïa ka surok Four Lane na Umshyrpi-Bañiun

0

Shillong, Lber, 21: U Symbud Myntri Rangbah ka Jylla u Bah Prestone Tynsong ha ka sngi Baar u la ong ba ka jingshna ïa ka surok Four Lane na Umshyrpi sha Bañiun, kaba hap ha ka Package-I jong ka surok Shillong-Dawki projek, ka dang don mynta hapdeng ka jingkhot tender.
Haba jubab ïa ka jingkylli ba la wanrah da u MLA ka Congress na Mylliem u Bah Ronnie V. Lyngdoh, u Bah Prestone Tynsong u la ïathuh ba ka Kompani ba la aiti ban trei ïa ka kam da ka Ministry ka la sangeh noh tang shiteng.
“Ha u bnai Lber-Ïaiong, 2022 da lade hi nga la leit sha Delhi bad nga la ïakynduh ïa u Secretary jong ka Ministry bad ngi la ïakren sani bha halor kane ka kam ïa kaba la rai ban khot tender biang. Hynrei, dang don tang kawei ka tender ba la thep, ki la phah khot tender biang sa shisien halor kane ka kam bad nga la thikna ba hapoh u bnai Ïaiong, ïa kane ka kam yn sa pyndep bad yn sa lah ban sdang biang ïa ka jingtrei,” la ïathuh u Bah Prestone hapoh ka Iingdorbar Thawaiñ.
U la pyntip shuh shuh ba ka jingpynkynriah ïa ki dieng bad ïa ki post elektrik ka dang ïaid shaid shaid bad ong, “ngi la shong ïa ka jingïalang bad u Chief Secretary ha kaba ngi la peitngor bha 24×7 ba ka jingpynkynriah ïa ki dieng bad ki post elektrik dei ban pyndep noh ha shwa ka 15 tarik, Ïaiong, .”
Ha kaba ïadei bad ka Package-5 bad ka Package-3 jong kane ka projek, u Symbud Myntri Rangbah u la ong, “na ka bynta ka package-5, ka jingkhot tender biang ka la jan poi artat sha kaba kut hadien ba ka kompani ka la aiti noh ïa ka kam bad na ka bynta ka Package-3, kaba dei na ka bynta ban shna ïa ka surok bypass ha Pynursla, ka NHIDCL ka dang pynkhreh ïa ka Detailed Project Report (DPR) hadien ba ki trai khyndew bad ki khlieh nongsynshar shnong ki la rai ban ym pyrshah ïa ka jingshna ïa kane ka surok by-pass.”
U Bah Ronnie Lyngdoh haba buh shuh shuh ïa ki jingkylli bynrap ha kaba ïadei bad ka jingdheng kali kaba jur ha shilynter jong ka surok kaba ktah haduh katta katta ïa ki nongshong shnong jong ki shnong kiba hap hapoh ka thaiñ Upper Shillong bad ha kiwei kiwei ki bynta u la kyrpad ïa ka Sorkar ba kan shna pynstet noh ïa ka surok Western Bypass khnang ba kan weng ïa kane ka jingeh.
Haba ai jubab halor kane, u Symbud Myntri Rangbah u la ïathuh ba ka jingshna ïa ka Western Bypass ka dang sah sa tang ban aiti noh ïa ka jaka sha ka kompani la kumno kumno hapoh lai bnai khnang ba kan dup lah ban sdang noh ïa ka jingtrei.”
U MLA ka VPP na Nongkrem u Bah Ardent M. Basaïawmoit u la pan jingpynshai ban tip kaei ka jingpynshitom ïa ki kompani kiba la iehnoh shiteng ïa ka kam, u Bah Prestone u la ong, watla ïa ka jingkhot tender kam hap hapoh ka jingpeit jong ka tnat PWD ka Sorkar Jylla hynrei dei ka Ministry kaba la khot ïa ka tender bad aiti ruh ïa ka kam hynrei ki don khyndiat ki kyndon shwa ban soi ïa ka work order bad kawei na ki, ka dei ‘lada jai ba ki (kompaniO) kim lah ban trei lane ki iehnoh shiteng ïa ka kam, ïa ka pisa kaba ki la thep kum ka security deposit kin duh noh.”
Shuh shuh u Symbud Myntri Rangbah u la pyntip ba ka jingtrei na ka bynta ka package-2 ka la poi mynta 37.7% bad ka package-4 ka la poi 30.10%.

Leave A Reply

Your email address will not be published.