Pyntikna u DC ba ka jingpynkhreh ïa ka 6th M’laya Game hapoh ka District kala long ba la biang

Jowai, Kyllalyngkot 18: Shuwa ba ka 6th Meghalaya Games kan sdang haka 20 haduh 25 tarik u bnai nyngkong, ka jingpynkhreh ïa ki jaka bad kiwei de ki jingdonkam kila long kiba ïaidbeit ïaid ryntih, la pyntip u Deputy Commissioner u bah BS Sohliya ha ka jingïalang bad ki nongthoh khubor mynta ka sngi saitjaiñ 18.01.2025, ha kamra Conference Hall ka ophis u DC.
Haba kren sha ki lad pathai khubor, u Deputy Commissioner ula pynpaw ïa ki baroh ki jingdonkam ba kyrpang ba la leh ha ka jingpynkhreh ïa ki jingïalehkai, kynthup ïa ka jingïalang pynher pyrda kaba la pyndep, ka jingpyni ïa ka video theme song bad ka jingpynpaw paidbah ïa u Mascot “U Kiang”. ha ka dur u Leopard u mrad jong ka jylla uba la pynitynnad ha ka riam jong u nongïaleh laitluid “U Kiang Nangbah” bala pynwan dur da u ma Kamtre Sumer kum shi bynta jong ka jingïakop kaba la pynlong da u Deputy Commissioner ka West Jaiñtia Hills.
U DC u la khot ruh ïa ki nongshong shnong ban ïatreilang bad ki jingpynbeit bad ban ïashim bynta shitrhem ha kane ka jingïalehkai, da kaba pynshlur ïa ki ym tang ba kin noh synñiang sha ka jingïaid beit ïaid ryntih jong ki jingïalehkai hynrei ban sakhi ruh ïa ki jingïalehkai da ka jingkmen.
U President bah John Kharshiiing, ula ïaroh ïa ka bor synshar district bad ïa ki 15 tylli ki komiti kiba la trei shitom ha ka jingpynkhreh ïa ka Meghalaya Games. Ula pynksan ïa kawei ka bynta kaba kyrpang jong kane ka jingïalehkai Meghalaya kaba 6, da kaba pyntip ba ka dei ka sien kaba nyngkong ba hynriew ngut ki nongïalehkai para, saw ngut ki kynthei bad 3 ngut ki shynrang, kin ïashim bynta ha ka jingïalehkai para siat suloi). ïa kane ka jingthmu la pynlong hadien ka jingkyrpad jong u Myntri Rangbah ka Jylla u Conrad K Sangma ban kynthup ïa ki para-athlete.
U la pynpaw ruh ïa ka jingkyrmen ba ha ki por ban wan kan don ka jingïashim bynta kaba kham bun jong ki para-athlete, da kaba pynpaw ba ka jylla ka aiti lut ban kyntiew ïa ka jingïadon bynta lang ha ki jingïalehkai. U la ong ruh ba, ha kane ka Meghalaya Games yn sakhi ïa kumba 3500 ngut ki nongïalehkai ki ban ïakhun na ka bynta baroh 1600 tylli ki takma, ba kynthup ïa 400 tylli shaneng ki takma ksiar, 400 tylli shaneng ki takma rupa bad 600 tylli ki takma rupa.
U Superintendent of Police u C Syrti, MPS ula pyntip ba ki bor Pulit ki la pynkhreh pura bad yn sa pyntreikam ha ki jaka ba donkam khnang ban pynthikna ïa ka jingshngaiñ haka por ba long ka jingïalehkai ka Meghalaya. U SP u la pynpaw ruh ba la pyndep bad pynmih ïa ki jingpynbeit ïa ka leit ka wan khnang ban pynsuk bad pynthikna ïa ka jingïaid lynti kaba khlem jingeh ha baroh kawei ka jingïalehkai.
Kiwei de kiba ïadon lang ki kynthup naduh ka Additional Deputy Commissioners kong D V Lyngdoh, ADC, kong B.Blah ADM, u Assistant Director Sports and Youth Affairs bad District Sports Officer WJHD ma Khroo Passah nalor kiwei de.