Ha ka 27 & 28 tarik Kyllalyngkot yn sdang ka Semi final jong ka MSL 2024

Shillong, Kyllalyngkot 19: Ka Meghalaya Football Association ka la pynbna ïa ki tarik ban pynïalehaki ïa ka wat ïakhun semi final jong ka Meghalaya State League 2024.
Ka jingïalehkai kaba nyngkong kan long hapdeng ka Ladthadlaboh bad ka Mawlai, ïa kaba la buh ban long ha SSA Stadium, Polo, ha ka 27 tarik mynta u Kyllalyngkot. Hadien kane yn bud sa ka jingïakhun semi final ba khadduh hapdeng ka Rymbai Shkenshynriah bad ka Shillong Lajong ban long ha ka 28 tarik Kyllalyngkot ha Wahiajer Multipurpose Sports Complex.
ïa ka Semifinal kaba nyngkong yn pynlong ha ka por jan miet, kaba sdang naduh ka por 4 shiteng janmiet, katba kaba ar kan sdang ha ka por 1 baje shiteng mynsngi. Na bynta ki Tiket lah ban ïoh ha baroh ar tylli ki madan katba nangjan sha ka sngi ïalehkai, ha kaba ki nongkyrshan kin lah ban jied hapdeng ki jaka shong ha ka dor ba T.50 bad kaba T.100.
Haba phaidien, ka Lajong ka la pynkhyllem noh ïa ka Rangdajied United – kaba dei ka lahduh ba bat ïa ka burom da 3-1 kol ha ka quarterfinal ba nyngkong, nangta ka Ladthadlaboh ka la pynliem pat ïa ka Sutnga da 5-2 kol, bad ka Mawlai ka la jop kput ïa ka Khliehmawlieh da 8-0 kol. Hadien nangta, ka R Shkenshynriah ka la mih na East Jaintia Hills sha Tura ha kaba ki la pynliem noh ïa ka Chipakkore da 2-0 kol.
Hadien ba la sdang da ki jingdon jong 24 tylli ki kynhun kiba la shah jied na kylleng ki dong jong ka jylla Meghalaya, mynta ki sah sa tang saw tylli – ar tylli kiba na Shillong (Lajong bad Mawlai), kawei na West Jaiñtia Hills (Ladthadlaboh) bad kawei na East Jaiñtia Hills (R Shkenshynriah).
Ka MSL, kaba la pynlong da ka Meghalaya Football Association bad la kyrshan da ka Sorkar Jylla, ka la wanrah ïa bun tylli ki jingïalehkai kiba pynkyndit ha kine ki por ba la leit bad ki paid nongkyrshan ba ieid phutbol kin khmihlynti da ka jingkmen ïa kane ka jingïalehkai semifinal
Na kine ki saw tylli ki kynhun dei tang ka Lajong bad ka Mawlai kiba la poi sha ka semi final ha ka MSL mynshwa, ha kaba ka SLFC ka la rah syndon ïa ka nam lahduh ha ka sien pynlong kaba ar ha u snem 2019. Ka Niaw Wasa United ka la ïohrah nyngkong ha u snem 2018 bad ka Rangdajied ha u 2023.