Jop ka Mawjam bad ka Shillong Sixers ha ka SCA Cricket League Third Division 2024-25

0

Shillong, Kyllalyngkot 19: Ka lympung ïalehkai Shillong Cricket League ha ka kyrdan Third Division 2024-25 ba la pynïaid da ka Shillong Cricket Association ryngkat ka jingïatreilang bad ka Samkhamti ha madan Urkaliar, Shillong. Ha ki ar tylli ki jingïalehkai ba la long hynne ka sngi la sakhi ïa ka Mawjam bad ka Shillong Sixers kiba la khur ïa ka jingjop.
Ka jingïalehkai kaba nyngkong la sakhi ïa ka Dynamite CC kaba la shah pynliem ha ka Mawjam CC da 6 wiket. Ka Dynamite ka la sdang da kaba tied nyngkong hadien ba jop ïa ka toss, haba tied nyngkong ka la lah ba kan kamai 140 ron haduh kaba kut jong ka 20 over ba la mang bad shah pynhap 9 wiket.
Napdeng ki nongtied kiba la seisoh tam u dei u Chintu Shah u ba la kamai 55 ron naki 50 bol, haba phai pat sha ki rangkawangbol u Samarjeet kr Rai u la khur 3 wiket naki 4 over bad shah tied 19 ron, nangta u Sumit kr Shah u la khur 2 wiket naki 2 over bad shah tied 17 ron.
Haba jubab ïa ka thong ba la buh, ka Mawjam ka la tied pyndep tang hapoh 16.3 over, kata ban kynjoh 142 ron bad khyllem 4 ngut, ban jop ïa ka jingïalehkai da 6 wiket. Dei tang u Brewill A Sangma u ba la seisoh ha ka bol na ka liang pyrshah (4 over: shah tied 18 ron: khur 1 wiket).
Napdeng ki nongtied, u Aman Marbaniang u la kamai 46 ron naki 42 bol, bad ka namtam ka la leit sha u Raja Gurung u ba la tied 59 ron naki 30 bol ban khur syndon ïa ka nam ‘Player of the match’.
Ha ka jingïalehkai kaba ar ka Shillong Sixers ka la jop ïa ka jingïalehkai da 42 ron pyrshah ïa ka Inningstars. Ka Shillong Sixers ka la shimti ban tied nyngkong hadien ba jop ïa ka toss, ha kaba ka la lah ba kan kamai 159 ron hap 9 wiket naki 20 over ba la mang. U Sandeep Roy u la kamai 65 ron naki 42 bol.
Haba phai sha ki rangkawangbol jong ka Inningstars u Jitender Rai u la khur 4 wiket naki 4 over bad shah tied 26 ron, nangta u Marshal Marbaniang u la khur 2 wiket naki 4 over bad shah tied 27 ron.
Haba pyrshang beh ïa kane ka thong ka Inningstar ka la shah khanglad noh da 117 ron naba shah pynhap baroh 10 wiket da tang naki 15.5 over, watla kata ruh, na ka liang jong u Jitender Rai (23 ron naki 18 bol) bad u Sumit Narzary (19 ron naki 16 bol) ki la pyrshang katba lah ban kyntiew ïa ka ron na bynta ka kynhun.
ïa ka namtam la khur da u Sandeep Roy, nalor ba u la seisoh ha ka tied da kaba kamai 65 ron naki 42 tylli ki bol, u la tyngshaiñ ruh ha ka bol da kaba khur 4 wiket naki 3 over bad ailad tang 20 ron, kaba la ïarap borbah ïa ka kynhun ban jop ïa ka jingïalehkai ha kaba u la khur ruh ïa ka nam Player of the match.

Leave A Reply

Your email address will not be published.