Khliehriat, Nohprah 19: Kumba ju leh man la u snem, mynta ka kynti ruh ka Dorbar Shnong Mollamylliang ka la pynthaba da ki ding ha ki rong ki rup bapher bapher ha ka shnong baroh kawei kaba ju tip tip ruh kum ka tamasa pynthaba ding krismas, ïa kane ka jingpynthaba ding ha shnong la wan ban pyllait da u MP ka Rajya Sabha, u Dr W.R.Kharluki uba la long ruh kum u kongsan bad ka MLA ka thaiñ, ka kong Santa Mary Shylla kum ka symbud kongsan bad la ïa don ryngkat lang ruh u Director jong ka tnat DIPR Shillong, u bah Malthud Sangma bad kiwei kiwei ki riew rangbah jong ka thaiñ.
Na ka liang ka Dorbar Shnong Moolamylliang, lyngba u Waheh Shnong, u bah Apmon Pashiang, la ong ba kane ka jingpynthaba ding Krismas, kaba pynthaba ha ki rong bapher bapher ha baroh kawei ka shnong ka long kum ka jingpdiang sngewbha ïa ka aiom lehkmen krismas bad kane ka jingpynthaba ding ka la sdang naduh katei ka sngi jong ka 18 tarik man la ka miet naduh ka por 5 baje janmiet haduh ka por 12 baje mynmiet bad yn pynkut ïa kane ka tamasa pynthaba ding ha ka 3 traik u kyllalyngkot 2024.
Na ka liang ka Dorbar Shnong ka pynbna ruh ba kan don ka Christmas concert ha ka janmiet jong ka 22 tarik u nohprah ha kaba ka kynhun tem “TAKEN ABACK” kaba na Mawngap, East Khasi Hills District bad ka kynhun “THE LYNX” kaba na West Jaiñtia hills District Jowai kin wan ban pynsawa ïa ki sur jingrwai krismas.
Ha ka janmiet jong ka 23 tarik nohprah pat ka kynhun tem jong u bah Eladmitre Dkhar bad u DJ Wanshan, kin pynsawa ïa ki sur jingtem ha katei ka shnong.
Kum ka jingpashat jingtip, ka shnong Moolamylliang, East Jaiñtia Hills District ka jngai 112 kilo mitar na ka nongbah Shillong bad 15 kilo mitar na ka District headquarter, Khliehriat.
Ka Dorbar Shnong ka la pynkhreh ruh ïa ki jaka sah miet na ka bynta kito kiba kwah ban sah miet, kata ha Guest House, Khliehriat, phone number, 9366455744, East Side Inn, phone number 9089390888, Mon Maya Guest House, phone number -8132002479 bad ha Wika Guest House, phone number – 6009538618.
Na ka bynta kito kiba wan thymmai ha kane ka shnong, ki lah ban pyndonkam da ka google map “Moolamylliang Presbyterian Church” lane ban scan ïa u OR Code.
Na ka bynta kito kiba wan ha ka por myn sngi, ka don ki dukan ba die jingbam hajan shnong ba la pynkhreh da ka Tista Hotel Khliehriat.
Ka Dorbar Shnong, Moolamylliang ka khot, iawer bad pdiang sngewbha kiba wan hapoh shnong ba kin sakhi da la ki jong ki khmat ïa ka jingphuh jingphieng jong kane ka tamasa pynthaba ding Krismas.
