Dei ka sorkar bad ka MLA bym shimkhia ban phah maramot ïa ka surok NH 6 ha Narpuh : KSU

Khliehriat, Nohprah 19: Ka Khasi Stidents Union Narpuh Circle, ka kynnoh pyrshah ïa ka sorkar MDA 2.0 ba lam khmat da u myntri rangbah, u Conrad.K. Sangma bad ka nongmihkhmat jong ka Sutnga Saipung Constituency ka kong Santa Mary Shylla, ki bym shym la shim khia eiei ruh halor ka jingeh ba ki paidbah ki iakynduh ha ka leit ka wan na ka daw ka jingsniew palat ka surok ha ka thaiñ.
Ka seng ka sngewkhia jur halor ka jingleh kuman bad leh mynthi kane ka sorkar jong u Conrad ka bym shym la bthah satia ïa ka National Highway Authority of India ban maramot ïa ka surok ha Narpuh “Kane ka dei ka por ba ki paidbah ki kwah ban pynkhreh ban ialeh kmen krismas bad pynkhreh ban leh kmen snem thymmai, hynrei ki mad tang ki jing kordit pat haba phai sha ka jinglong jingman ka surok ha ka thaiñ, ki khynnah kiba ju ïaid chrismas carol, ki paidbah kiba leit sha ki ïew ki hat, ki mad tang da ka khyndew pum pum haba ïaid ha surok bad ki jaka ïew kiba don hajan surok kane shisha ka buh jingeh bha ha ka leit ka wan bad ka buh jingma ruh ïa ka koit ka khiah, ka surok ha ka thaiñ ha kiba bun ki jaka ka la i kum ka surok khlaw ka bym ithuh ithaw shuh bun sa tang ki thiew ki syar, bun ki jaka ba ka surok rong ka la kylla sha ka surok khyndew, hato ka sorkar bad ka nongmihkhmat kim iohi mo ïa kane ka jinglong jingman kane ka surok, hato kim don mo ka jingpyrkhat sngewlem ïa ki paidbah kiba mad jingeh?” pynpaw u Vice President jong ka KSU Narpuh Circle, u bah Phanuel Tongper lem bad ki dkhot ka seng.
Ki nongïalam bad ki dkhot ka seng ki la iathuh ruh ba namar ka jinglong jingman ka surok kaba la julor shaba palat, ka ju wanrah ïa ka jingdheng kali kaba jur bha ha ka thaiñ, bun ki kali ba kit jingkit ki sniew shiteng lynti bad don ruh kiba kylla khongpong ha surok bad kane ka wanrah jingeh ha ka leit ka wan ki paidbah namar ka wanrah ïaka jingdheng kali kaba jur bha ha kane ka surok NH-6 ha Narpuh kata khamtam naduh Lumshnong ter ter shaduh Ratacherra-Malidor “Bun ki nongshong shnong jong ka thaiñ ki kwah ban ai rong ai rup bad ban pynitynnad ïa ki iïng ki sem ha kum kane ka aiom leh kmen hynrei ki hap ban sangngeh noh namar kim sngew myntoi namar ba jur palat ka khyndew pum pum kaba mih na surok, kane ka jinglong jingman ka surok ka ju pyn diaw mynsiem bad pynduh jingkyrmen ïa ki paidbah bad bunsien haba ki thmu ban leit jingleit ki ju iohi lypa ïa ka jingeh ba kin sa iakynduh ha surok ha kaba ki hap ban iaid na ka surok ba dap da ki thliew ki syar bad ki hap ban mad ïa ka khyndew pum pum bad jingdheng kali ha lynti, pynpaw shuh shuh ki nongialam ka seng.
Ka seng ka pynpaw ruh ka jingsngew khia namar bunsien kito kiba pang ba shitom ruh ki ju sahkut lang ha ka jingdheng kali kaba ju jia khah khah ha ka thaiñ bad ong ruh ba lada jia kano kano kaba sngewssih ïa kiba pang ba shitom, ka sorkar bad ka nongmihkhmat ki hap ban shim ïa ka jingkitkhieh, bun ruh ki ba iaid lyngba na kane ka surok khamtam kiba wan na kiwei pat ki jylla kiba iaid ïa ka lynti ba jngai, ki ju mad ïa ka jingeh ha ka jingsahkut kali ha ka thaiñ. Haba i kumne ym ikop ban ong ba don nongmihkhmat, i kumba ym don eiei. Kane ka dei ka kput kylliang kaba i MLA kane ka thaiñ i siew ïa ki paidbah, dei hok ba in leh kumne namar la dep thied da ki phew lak tyngka ha ka por election
“Ka seng ka la dep pynlong bun ki jingiakhih bad ka la dep khang tala ruh ïa ka jaka lum khajna jong ka NHAI kaba don ha Lumshnong, hynrei kine baroh imat kim poi shei shaei ruh, mynta ka seng ka byrngem ba kan sa shim da kawei pat ka synjam kaba kham tyngeh ba ka sorkar bad ka nongmihkhmat kin pei shkor’ pynpaw shuh shuh ki nongialam ka KSU na Narpuh.